Toshkentdagi Shayxontohur tumanidagi xonadonlardan birida yashirin faoliyat olib borgan narkolaboratoriya aniqlandi.
Ushbu narkolaboratoriya Davlat xavfsizlik xizmati xodimlari tomonidan Bojxona qo‘mitasi xodimlarini jalb qilgan holda o‘tkazilgan maxsus tadbir davomida fosh etilgan.
1986 va 1988-yillarda tug‘ilgan, oliy ma’lumotli ikki kishi logistika faoliyati bilan shug‘ullanish niqobi ostida Shayxontohur tumanidagi xonadonlardan birida sintetik giyohvandlik vositalarini ishlab chiqarish bilan shug‘ullangan.
Ko‘zdan kechirish jarayonida xonadonda jami 56 ta o‘ramda 26 kiloga yaqin “Mefedron” giyohvandlik vositasi, sintetik narkotik tayyorlashda foydalaniladigan 400 kilodan ortiq suyuqlik va kukun ko‘rinishidagi kimyoviy moddalar hamda xomashyolar, zarur asbob-uskunalar borligi aniqlanib, protsessual tartibda rasmiylashtirib olingan.
Tergovga qadar tekshiruv davomida, giyohvandlik vositalari tayyorlashda foydalaniladigan asbob-uskunalar, xomashyo va prekursorlar xorijdan keltirilgani va tayyorlangan narkotik moddalarning savdosi internet tarmog‘i orqali amalga oshirilgani aniqlangan.
Tadbir davomida olingan narkotik moddalar taxminan 80 ming “doza”ni tashkil qilishi va qora bozordagi qiymati 900 ming dollarga tengligi, shuningdek, narkolaboratoriyada saqlanayotgan 400 kilodan ortiq kimyoviy moddalar va xomashyolar yordamida 50 kiloga yaqin “Mefedron” sintetik giyohvandlik vositasi ishlab chiqarish mumkinligi ma’lum bo‘ldi.
Narkolaboratoriya aniqlangani holati yuzasidan Jinoyat kodeksining 246 (kontrabanda) va 273-moddalari (giyovandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) bilan jinoyat ishi qo‘zg‘atilib, DXX Tergov boshqarmasi tomonidan dastlabki tergov harakatlari olib borilmoqda.
Izoh (0)