DXX Samarqand viloyatida giyohvand moddalar oldi-sotdisi bilan shug‘ullanib kelgan guruhni qo‘lga oldi. Bu haqda viloyat IIB axborot xizmati xabar berdi.
Ma’lum qilinishicha, DXXning Samarqand viloyati bo‘yicha boshqarmasi xodimlari tomonidan viloyat IIB bilan hamkorlikda tezkor tadbir o‘tkazilgan. Tadbirda Urgut tumanida yashovchi 1978 va 1986-yillarda tug‘ilgan opa-singil 911 gramm opiy giyohvandlik moddasini 12 ming AQSH dollariga sotgan vaqtida ushlangan.
Tezkor surishtiruv harakatlari davomida ular ushbu giyohvandlik moddasini mazkur tumanda istiqomat qiluvchi 33 yoshli ikki nafar shaxsdan olgani aniqlanib, ular ham qo‘lga olingan.
Shuningdek, ushbu shaxslarning yashash xonadonlarida o‘tkazilgan tintuv-tergov harakatlari davomida ulardan birining uyidan kelgusida sotish maqsadida saqlab kelinayotgan 228 gramm, ikkinchisidan esa 7 kilogramm 187 gramm opiy moddasi xolislar ishtirokida rasmiylashtirib olingan.
Aniqlanishicha, tezkor tadbir davomida olingan jami 8 kilogramm 326 gramm opiy moddasi mamlakatga Tojikistondan kontrabanda yo‘li bilan olib kelingan.
Hozirda qo‘lga olingan to‘rt nafar fuqaroga nisbatan Jinoyat kodeksining 246- (kontrabanda) va 273-moddalari (giyovandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) bilan jinoyat ishi qo‘zg‘atilgan.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)