2023-yili O‘zbekistonga tashrif buyurgan bir sayyoh o‘rtacha 323 dollar sarflagani maʼlum qilindi. Bu haqda Markaziy bank tomonidan eʼlon qilingan “Pul-kredit siyosati sharhi”da ko‘rsatilgan.
Qayd etilishicha, 2023-yil yakunlari bo‘yicha dunyo bo‘ylab sayyohlar soni 1,3 mlrd kishini yoki pandemiyadan oldingi darajaning (2019-yilda 1,5 mlrd kishi) 88 foizini tashkil qilgan. O‘tgan yil yakuni bo‘yicha esa O‘zbekistonga tashrif buyurgan sayyohlar soni 6,6 mln kishini tashkil etib, 2022-yilga nisbatan 27 foizga o‘sgan (2022-yilda – 5,2 mln kishi).
Turistlarning asosiy oqimi (79%) qo‘shni mamlakatlar – Qozog‘iston, Qirg‘iziston va Tojikiston hissasiga to‘g‘ri kelmoqda. Ushbu davlatlardan aksariyat sayyohlar qarindoshlarni yo‘qlash, davolanish, o‘qish va savdo qilish maqsadida tashrif buyurishi taʼkidlanmoqda.
Qolgan xorijiy mamlakatlardan kelgan sayyohlarning ulushi so‘nggi yillarda 15-20 foiz atrofida shakllanmoqda. Uzoq mamlakatlardan kelayotgan turistlarning tashrifidan asosiy maqsad – sayohat bo‘lmoqda. 2023-yilda jami xizmatlar eksportida safar xizmatlari ulushi 41 foizga yetib, 2,1 mlrd dollarni tashkil qilgan.
Bunda, O‘zbekistonga tashrif buyurgan bir sayyohning o‘rtacha qilgan xarajati 2023-yilda 323 dollarga to‘g‘ri kelib, oldingi yilga nisbatan 5 foizga oshgan.
“O‘sib borayotgan turistik oqim iqtisodiy o‘sishga ijobiy taʼsir ko‘rsatib, xizmatlar sohasi ko‘lami kengayishi, bandlikni oshishi, xizmatlar xilma xilligi va sifati oshib borishiga turtki beradi. Shu bilan birga, ushbu tendensiya ichki bozorda qo‘shimcha isteʼmol talabini vujudga keltiradi. Bunda, isteʼmol tovarlari, xususan oziq-ovqat mahsulotlari va transport xizmatlari taklifini oshirib borilishi, kelgusida isteʼmol narxlariga inflyatsion bosimni yuzaga kelishini oldini oladi”, – deyiladi “Pul-kredit siyosati sharhi”da.
Izoh (0)