Qashqadaryoda onkologik kasalliklarni erta bosqichda aniqlagan tibbiyot brigadalariga har bir aniqlangan holat uchun beriladigan pul mukofoti ma’lum qilindi.
Prezidentning 9-fevraldagi qaroriga ko‘ra, 1-maydan boshlab onkologik kasalliklarni erta bosqichda aniqlagan tibbiyot brigadalari har bir aniqlangan holat uchun Tibbiyot muassasalarining moddiy rag‘batlantirish va rivojlantirish jamg‘armasi mablag‘lari hisobidan 2 million so‘m miqdorida rag‘batlantiriladi.
Sog‘liqni saqlash vazirligi Iqtisodiyot va moliya vazirligi bilan birgalikda 2024-yil 1-martga qadar onkologik kasalliklarni erta bosqichda aniqlagan tibbiyot brigadalarini rag‘batlantirish tartibini tasdiqlashi lozim.
Shavkat Mirziyoyev raisligida 5-fevral kuni bo‘lib o‘tgan videoselektor yig‘ilishida kasalliklarni erta aniqlash, jumladan, kardiologiya, endokrinologiya va onkologiya skrininglarini tashkil etishda yo‘l qo‘yilayotgan kamchiliklar ko‘rsatib o‘tilgandi.
2023-yilda onkologiya kasalligi bilan ro‘yxatga olingan bemorlarning qariyb yarmida kasallik kech aniqlangani, joylarda dispanser nazoratida turgan, surunkali kasalligi bor aholini sog‘lomlashtirish ishlari yetarli emasligi qayd etilgandi.
Yig‘ilishda onkologiya bo‘yicha har bir erta aniqlangan holat uchun tibbiyot brigadalariga mukofot berish joriy qilinishi, bu tajriba 1-maydan Qashqadaryoda boshlanib, kelgusi yildan boshqa hududlarda yo‘lga qo‘yilishi ma’lum qilingandi.
Izoh (0)