Surxondaryoda 2024-yili 1,3 ming gektar maydon dehqon xo‘jaligi tashkil etish uchun ajratiladi, deb xabar bermoqda viloyat hokimligi matbuot xizmati.
Maʼlum qilinishicha, viloyat hokimi Ulug‘bek Qosimov Termiz tumanida bo‘lib, “Nurafshon” mahallasidagi auksionga chiqarilgan 6 gektar yer maydonining 1 gektar qismida issiqxona tashkil etish, ko‘chatchilik va sabzavot mahsulotlari yetishtirish, ushbu sohada aholini o‘qitish, 2024-yilda dehqon xo‘jaligi tashkil etish uchun ajratiladigan 1 353 gektar yer maydonlari taqdimoti bilan tanishgan.
Shuningdek, “Leto” korxonasiga ajratish uchun taklif etilgan 100 gektar yer maydoni ham taqdimot qilingan. Mutasaddilarga taqdimotlar yuzasidan tegishli vazifalar belgilab berilgan.
Viloyat rahbari Angor tumani “Ilg‘or” mahallasida dehqon xo‘jaliklari tashkil etilgan, suv taʼminoti og‘ir bo‘lgan 14,1 gektar yer maydonidagi suv muammosiga ham eʼtibor qaratgan. Hokim burg‘ilash ishlarini olib borib, suv nasosi o‘rnatish uchun zarur mablag‘ni ajratish masalasida topshiriq bergan.
Ulug‘bek Qosimov, shuningdek, Jarqo‘rg‘on tumanining “Qo‘shtepa” mahallasiga tutash hududdagi 318 gektar yer maydonini o‘zlashtirish va kooperativlar tashkil etish loyihasi bilan tanishgan. Ushbu mahallada qishloq xo‘jaligi mahsulotlari yetishtirayotgan aholi xonadonlaridagi issiqxonalar, ko‘chatchilik faoliyati ko‘zdan kechirilgan.
Mutasaddilarga aholining yoqilg‘isiz isitiladigan va tomchilab sug‘orish orqali mahsulot yetishtirish tajribasini ommalashtirish, namuna asosida boshqa hududlarda ham ixcham issiqxonalar faoliyatini yo‘lga qo‘yish topshirilgan.
Izoh (0)