2023 йили Ўзбекистонга ташриф буюрган бир сайёҳ ўртача 323 доллар сарфлагани маълум қилинди. Бу ҳақда Марказий банк томонидан эълон қилинган “Пул-кредит сиёсати шарҳи”да кўрсатилган.
Қайд этилишича, 2023 йил якунлари бўйича дунё бўйлаб сайёҳлар сони 1,3 млрд кишини ёки пандемиядан олдинги даражанинг (2019 йилда 1,5 млрд киши) 88 фоизини ташкил қилган. Ўтган йил якуни бўйича эса Ўзбекистонга ташриф буюрган сайёҳлар сони 6,6 млн кишини ташкил этиб, 2022 йилга нисбатан 27 фоизга ўсган (2022 йилда – 5,2 млн киши).
Туристларнинг асосий оқими (79%) қўшни мамлакатлар – Қозоғистон, Қирғизистон ва Тожикистон ҳиссасига тўғри келмоқда. Ушбу давлатлардан аксарият сайёҳлар қариндошларни йўқлаш, даволаниш, ўқиш ва савдо қилиш мақсадида ташриф буюриши таъкидланмоқда.
Қолган хорижий мамлакатлардан келган сайёҳларнинг улуши сўнгги йилларда 15-20 фоиз атрофида шаклланмоқда. Узоқ мамлакатлардан келаётган туристларнинг ташрифидан асосий мақсад – саёҳат бўлмоқда. 2023 йилда жами хизматлар экспортида сафар хизматлари улуши 41 фоизга етиб, 2,1 млрд долларни ташкил қилган.
Бунда, Ўзбекистонга ташриф буюрган бир сайёҳнинг ўртача қилган харажати 2023 йилда 323 долларга тўғри келиб, олдинги йилга нисбатан 5 фоизга ошган.
“Ўсиб бораётган туристик оқим иқтисодий ўсишга ижобий таъсир кўрсатиб, хизматлар соҳаси кўлами кенгайиши, бандликни ошиши, хизматлар хилма хиллиги ва сифати ошиб боришига туртки беради. Шу билан бирга, ушбу тенденция ички бозорда қўшимча истеъмол талабини вужудга келтиради. Бунда, истеъмол товарлари, хусусан озиқ-овқат маҳсулотлари ва транспорт хизматлари таклифини ошириб борилиши, келгусида истеъмол нархларига инфляцион босимни юзага келишини олдини олади”, – дейилади “Пул-кредит сиёсати шарҳи”да.
Изоҳ (0)