Toshkent viloyatlarida tabiiy gaz va elektr energiyasidan noqonuniy foydalanish holatlari fosh etilmoqda, deb xabar bermoqda Iqtisodiy jinoyatlarga qarshi kurashish departamenti axborot xizmati.
Unga ko‘ra, holat Bosh prokuratura huzuridagi departamentning Yangiyo‘l, Chinoz va Zangiota tumani bo‘limlari, DXX, IIB va GTF xodimlari hamkorligida o‘tkazilgan tezkor tadbirlarda aniqlangan. Ushbu tumanlardagi “Shodlik”, “Ko‘kalamzor”, “Islomobod” va “Bo‘ston” MFYda yashovchi 5 nafar fuqaro xonadonlarida tashkil etgan issiqxonani hech qanday hujjatsiz umumiy foydalanishdagi tabiiy gaz tarmog‘iga o‘g‘rilik yo‘li bilan ulab, jami 356,8 million so‘mlik tabiiy gazdan noqonuniy foydalangani aniqlangan.
Shu kabi, departamentning Zangiota tuman bo‘limi, “O‘zenergoinspeksiya” va tuman GTF xodimlari hamkorligida o‘tkazilgan tergovga qadar tekshiruvda “Obod to‘qimachi” MFYda yashovchi D.X. o‘z uyida tashkil etgan issiqxonani umumiy foydalanishdagi tabiiy gaz va elektr tarmog‘iga o‘g‘rilik yo‘li bilan ulab, jami 342,7 million so‘mlik tabiiy resursdan noqonuniy foydalangani aniqlangan.
Xuddi shunday, departamentning Asaka tuman bo‘limi tomonidan “O‘zenergoinspeksiya” Andijon viloyat boshqarmasi va tuman elektr tarmoqlari korxonasi xodimlari bilan hamkorlikda o‘tkazilgan tadbirda “A.g.” MCHJ mas’ul shaxslari MCHJga tegishli “Sohibkor” massividagi bog‘da umumiy foydalanishdagi elektr tarmog‘iga tijorat maqsadida ulanib, jami 264,1 million so‘mlik elektr energiyasidan noqonuniy foydalangani aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)