Namangan va Andijon viloyatlarida elektr energiyasi tarmoqlariga noqonuniy ulanish holatlari fosh etildi, deb xabar beradi Bosh prokuratura huzuridagi departament.
Ma’lum qilinishicha, departamentning Yangi Namangan tuman bo‘limi tomonidan tergovga qadar tekshiruv o‘tkazilgan. Tekshiruvda “Guliston” MFYda yashovchi fuqaro D.O. yashash xonadonida hech qanday hujjatsiz tijorat maqsadida kompyuter o‘yinlari xizmatini tashkil etib, kompyuterlarni umumiy foydalanishdagi elektr tarmog‘iga ulab, jami 177 million so‘m elektr energiyasidan noqonuniy foydalangani aniqlangan.
Shu kabi, departamentning Asaka tuman bo‘limi tomonidan tuman ETK xodimlari bilan hamkorlikda o‘tkazilgan tezkor tadbirda “Sh.B.” fermer xo‘jaligi rahbari M.SH. hech qanday hujjatsiz ikkita suv nasosini tijorat maqsadida umumiy foydalanishdagi elektr tarmog‘iga ulab, jami 153 million so‘m elektr energiyasidan noqonuniy foydalanganligi aniqlangan.
Shuningdek, tergovga qadar tekshiruvda Asaka tuman ETK muhandisi F.Ya. fermer xo‘jaligi rahbari M.SH.ning ishonchiga kirib, elektr hisoblagich o‘rnatib berishi hamda hujjatlarini rasmiylashtirib berish evaziga 13 million so‘mni firibgarlik yo‘li bilan qo‘lga kiritgani aniqlangan.
Xuddi shunday, departamentning Shahrixon tuman bo‘limi tomonidan “O‘zenergoinspeksiya”va ETK xodimlari bilan hamkorlikda o‘tkazilgan tezkor tadbirda “O‘.Sh.” fermer xo‘jaligi rahbari M.A. hech qanday hujjatsiz ikkita suv nasosini umumiy foydalanishdagi elektr tarmog‘iga ulab, jami 106 million so‘m elektr energiyasidan noqonuniy foydalangani ma’lum bo‘lgan.
Mazkur holatlar yuzasidan Jinoyat kodeksining 168-moddasi (firibgarlik) va 169-moddasi (o‘g‘rilik) bilan jinoyat ishlari qo‘zg‘atilib, tergov harakatli o‘tkazilmoqda.
Avvalroq Samarqandda noqonuniy oltin qazuvchilar 753 mln so‘mlik elektr energiyasini o‘g‘irlagani ma’lum bo‘lgandi.
Izoh (0)