Тошкент вилоятида иккита иссиқхона табиий газдан ноқонуний фойдаланиши натижасида тизимга 577 миллион сўмдан зиёд зарар етказилгани аниқланди. Бу ҳақда Энергетика вазирлиги матбуот хизмати хабар берди.
Маълум қилинишича, “Ўзэнергоинспекция” томонидан Бош прокуратура ва ҳуқуқни муҳофаза қилувчи бошқа органлар, шунингдек, “Ҳудудгазтаъминот” АЖ ходимлари билан ҳамкорликда Тошкент вилоятида навбатдаги назорат тадбирлари ўтказилган.
Хусусан, Зангиота туманида жойлашган “М.А.” МЧЖ (495 миллион 56 минг сўмлик) ва ушбу туманда истиқомат қилувчи фуқаро Э.Қ. га қарашли иссиқхоналар (82 миллион 381 минг сўмлик) табиий газ ҳисоблагичисиз, тармоққа ноқонуний равишда уланганлиги натижасида давлат манфаатларига жами 577 миллион сўмдан зиёд зарар етказгани маълум бўлган.
Қоидабузар истеъмолчиларга нисбатан белгиланган тартибда чора кўриш учун тегишли ҳужжатлар расмийлаштирилиб, ҳуқуқни муҳофаза этувчи органларга тақдим қилинган.
Аввалроқ Самарқандда ноқонуний олтин қазувчилар 753 млн сўмлик электр энергиясини ўғирлагани маълум бўлгани, Асакада электр тармоқлари муҳандиси 13 млн сўмни фирибгарлик йўли билан қўлга киритгани аниқлангани тўғрисида хабар берилганди.
Изоҳ (0)