O‘zbekistonda yanvar oyida Energetika vazirligi huzuridagi “O‘zenergoinspeksiya” ishtirokida Bosh prokuratura hamda huquqni muhofaza qiluvchi organlar, elektr va gaz ta’minoti korxonalari mutaxassislari bilan hamkorlikda o‘tkazilgan nazorat tadbirlarida 995 ta isteʼmolchi tomonidan energiya resurslaridan noqonuniy foydalanish holatlari aniqlandi. Bu haqda “O‘zenergoinspeksiya” matbuot xizmati xabar berdi.
Qayd etilishicha, mazkur qonunbuzilishlari natijasida 20 million 486 ming kVt/soat elektr energiyasi va 47 million 387 ming metr kub tabiiy gaz talon-toroj qilingan bo‘lib, davlat manfaatlariga jami 94 milliard 542 million so‘m zarar yetkazilgan.
Respublikaning barcha hududlarida inspeksiya tomonidan 24 969 ta profilaktik tadbir o‘tkazilgan. Shuningdek, energiya resurslaridan foydalanish qoidalarini buzish bilan bog‘liq huquqbuzarlik bo‘yicha 937 ta ma’muriy ish rasmiylashtirilgan.
Energiya samaradorligi, avariya va texnika xavfsizligi qoidalariga rioya etilishi yuzasidan 14 ta davlat korxona va muassasasida nazorat tadbirlari o‘tkazilgan. Ta’minotchi korxonalar tomonidan amalga oshirilgan ishlar yuzasidan 1 540 ta obyekt hamda 2 565 ta ijtimoiy soha obyekti o‘rganilgan.
Shuningdek, reaktiv quvvatni kompensatsiya qiluvchi qurilmalar o‘rnatish yuzasidan tadbirkorlik subyektlarida tushuntirish ishlari olib borilib, 13 145 ta iste’molchiga tegishli ko‘rsatmalar berilgan.
Avvalroq Samarqandda noqonuniy oltin qazuvchilar 753 mln so‘mlik elektr energiyasini o‘g‘irlagani ma’lum bo‘lgani, Asakada elektr tarmoqlari muhandisi 13 mln so‘mni firibgarlik yo‘li bilan qo‘lga kiritgani aniqlangani to‘g‘risida xabar berilgandi.
Izoh (0)