Toshkent shahar ekologiya boshqarmasiga yangi rahbar tayinlandi

Akmal Rasulov Toshkent shahar Ekologiya, atrof-muhitni muhofaza qilish va iqlim o‘zgarishi boshqarmasi boshlig‘i etib tayinlandi.

Tayinlov Ekologiya, atrof-muhitni muhofaza qilish va iqlim o‘zgarishi vazirining tegishli buyrug‘iga ko‘ra amalga oshirildi.

Akmal Rasulov bunga qadar Toshkent shahar Ekologiya, atrof-muhitni muhofaza qilish va iqlim o‘zgarishi boshqarmasi boshlig‘i o‘rinbosari vazifasida faoliyat olib borgan.

Poytaxtda daraxtlar kesilishi davom etayotgani sababli Toshkent shahar ekologiya boshqarmasi vakolatlari 1-fevralga qadar cheklangandi. Toshkent shahar ekologiya boshqarmasi boshlig‘i Farhod Dehqonov faoliyatiga xizmat tekshiruvi tayinlanib, 2024-yilning 1-fevraliga qadar ishdan chetlashtirilgan.

Vazirning buyrug‘iga asosan xizmat tekshiruvi davomida boshqarmaning barcha tarkibiy bo‘linmalari rahbarlari, xodimlarining faoliyati hamda 2021–2023-yillar davomida boshqarma tomonidan davlat o‘rmon fondiga kirmaydigan yerlarda daraxtlar va butalarni kesishga berilgan ruxsatnomalarning qonuniyligi va asoslari o‘rganilishi belgilangan.

Farhod Dehqonov haqida

Toshkent shahri Chilonzor tumanida 58 tup daraxt kesilishi ortidan Toshkent shahar ekologiya va atrof-muhitni muhofaza qilish boshqarmasi boshlig‘i Farhod Dehqonov 2023-yil 9-sentyabr kuni hibsga olingandi. U Jinoyat kodeksining 205-moddasi 2-qismi ‘‘a’’ bandida (hokimiyat yoki mansab vakolatini suiiste’mol qilish, davlat yoki jamiyatga juda ko‘p miqdorda zarar yetkazish) nazarda tutilgan jinoyatni sodir etganlikda gumonlangan. 

Bu voqea jamoatchilik orasida norozilik keltirib chiqardi. Daraxtlar kesilishiga asosiy sababchilar — o‘sha hududda qurilish qilishga ruxsat berganlar chetda qolib, ekologlar bosh aybdor qilingani jamoatchilik vakillarini norozi qilgandi. Oradan bir kun o‘tganidan so‘ng Farhod Dehqonov qo‘yib yuborilgani haqida xabar berildi. Holat Prezident administratsiyasining sobiq rahbari Sardor Umurzoqov nazoratiga olingani aytildi.

Keyinchalik mazkur jinoyat ishining yakuni bo‘yicha ma’lumot berilmadi. Farhod Dehqonov esa o‘z ishida davom etdi.