Акмал Расулов Тошкент шаҳар Экология, атроф-муҳитни муҳофаза қилиш ва иқлим ўзгариши бошқармаси бошлиғи этиб тайинланди.
Тайинлов Экология, атроф-муҳитни муҳофаза қилиш ва иқлим ўзгариши вазирининг тегишли буйруғига кўра амалга оширилди.
Акмал Расулов бунга қадар Тошкент шаҳар Экология, атроф-муҳитни муҳофаза қилиш ва иқлим ўзгариши бошқармаси бошлиғи ўринбосари вазифасида фаолият олиб борган.
Пойтахтда дарахтлар кесилиши давом этаётгани сабабли Тошкент шаҳар экология бошқармаси ваколатлари 1 февралга қадар чекланганди. Тошкент шаҳар экология бошқармаси бошлиғи Фарҳод Деҳқонов фаолиятига хизмат текшируви тайинланиб, 2024 йилнинг 1 февралига қадар ишдан четлаштирилган.
Вазирнинг буйруғига асосан хизмат текшируви давомида бошқарманинг барча таркибий бўлинмалари раҳбарлари, ходимларининг фаолияти ҳамда 2021–2023 йиллар давомида бошқарма томонидан давлат ўрмон фондига кирмайдиган ерларда дарахтлар ва буталарни кесишга берилган рухсатномаларнинг қонунийлиги ва асослари ўрганилиши белгиланган.
Фарҳод Деҳқонов ҳақида
Тошкент шаҳри Чилонзор туманида 58 туп дарахт кесилиши ортидан Тошкент шаҳар экология ва атроф-муҳитни муҳофаза қилиш бошқармаси бошлиғи Фарҳод Деҳқонов 2023 йил 9 сентябрь куни ҳибсга олинганди. У Жиноят кодексининг 205-моддаси 2-қисми ъъаъъ бандида (ҳокимият ёки мансаб ваколатини суиистеъмол қилиш, давлат ёки жамиятга жуда кўп миқдорда зарар етказиш) назарда тутилган жиноятни содир этганликда гумонланган.
Бу воқеа жамоатчилик орасида норозилик келтириб чиқарди. Дарахтлар кесилишига асосий сабабчилар — ўша ҳудудда қурилиш қилишга рухсат берганлар четда қолиб, экологлар бош айбдор қилингани жамоатчилик вакилларини норози қилганди. Орадан бир кун ўтганидан сўнг Фарҳод Деҳқонов қўйиб юборилгани ҳақида хабар берилди. Ҳолат Президент администрациясининг собиқ раҳбари Сардор Умурзоқов назоратига олингани айтилди.
Кейинчалик мазкур жиноят ишининг якуни бўйича маълумот берилмади. Фарҳод Деҳқонов эса ўз ишида давом этди.
Изоҳ (0)