Ijtimoiy tarmoqlarda O‘zbekiston davlat sanʼat va madaniyat institutining 4-bosqich talabalari dekanat ularni institut yotoqxonasidan haydayotgani haqida murojaat bilan chiqishdi.
Murojaatda ular yotoqxona bilan bir yilga shartnoma tuzishgani, to‘lovlarni o‘z vaqtida to‘lashganini taʼkidlagan.
“Bizning sharoitimizni tushunishmayapti. Bizni qiziqtirmaydi deb, ko‘chaga haydashyapti. Biz nima qilaylik? Yotoqxonaga ishonib, sharoitimizni to‘g‘rilaganmiz. Kechadan beri tinchlik yo‘q. Yotoqxonada turli viloyatlardan kelgan talabalar yashaydi.
Qiz bola boshimiz bilan ertaga qayoqqa boramiz? Hamma narsa hal bo‘lgan, amaliyot joyimiz shu yerda, — deyiladi murojaatda.
Xo‘sh, aslida, vaziyat qanday? Masalani o‘rganish uchun Toshkent shahar hokimi o‘rinbosari Nodira Umarova talabalar yotoqxonasiga tashrif buyurdi. O‘rganish va surishtiruv ishlari olib borildi.
Talabalar noroziligiga sabab bo‘layotgan omillar nima? Ular haqmi yoki masalani bir tomonlama ochiqlashyaptimi? Bu savolga O‘zbekiston davlat sanʼat va madaniyat instituti rektori vazifasini bajaruvchi Eldor Shermanov quyidagicha javob berdi.
— Institutimizda ikkita talabalar turar joyi mavjud. Ularning umumiy sig‘imi 770 ta bo‘lib, yarmidan ko‘prog‘ini qizlar tashkil etadi. Bu yil hisobi bo‘yicha 97 nafar yuqori kurs talabalari istiqomat qilishyapti. O‘quv dasturida belgilanganidek, bitiruvchi talabalar 5-fevraldan 11-mayga qadar amaliyot o‘tashlari kerak. Talabalarning 46 nafari doimiy yashash hududlari bo‘lgan muassasalarda amaliyot o‘tashlari belgilangan. Biz o‘quv yili boshida joy yetmagani uchun talabalar yotoqxonasiga joylasholmagan va qimmat narxda ijara uyda qiynalib yashayotgan birinchi kurs talabalarini yotoqxonaga joylashtirishni rejalashtirgandik. Ammo viloyatlarda amaliyot o‘tashi kerak bo‘lgan talabalarning aksariyati Toshkentdan ketishni istamay, yotoqxonadagi o‘rnini ham bo‘shatmagan.
Amaliyot o‘tkazilishidan maqsad talaba uch oy davomida tajriba orttirishi belgilangan. Agar talaba amaliyotga borishni istamay, Toshkentda boshqa ishlar bilan shug‘ullanib yursa, oqibati qanday bo‘ladi?
Bundan tashqari, o‘sha talabalarning ko‘pchiligi yotoqxona uchun to‘lovlarni ham amalga oshirmagan. Belgilangan qaror bo‘yicha yotoqxonaga joylashish 200 ming so‘m etib belgilangan. Afsuski, ularning 80 foizi dekabr, yanvar oyi uchun ham to‘lovlarni amalga oshirmagan. Qo‘shimchasiga, belgilangan tartibda amaliyotni ham o‘tashni istashmayapti. Rahbariyat tomonidan tushuntirish ishlari olib borilganida “Bizni talabalar yotoqxonasidan majburan chiqarishyapti”, degan postlar joylashgan, — deydi Eldor Shermanov.
Jamoatchilik vakillari orasida talabalar moddiy jihatdan qiynalayotgani uchun to‘lovlarni amalga oshirolmayotgandir, degan eʼtirozlar ham bo‘ldi. Bu savolga Eldor Shermanov quyidagicha javob berdi.
— Agar Toshkent shahridagi ijara narxi bilan solishtiradigan bo‘lsak, talabalar yotoqxonasida yashash ancha arzon. Qonunda talabalar yotoqxonasining bir oylik to‘lovi 200 ming so‘m etib belgilangan. Ota-onalar bilan suhbatlashsak, pulni oldindan berib yuborishganini aytishadi. Ammo farzandlari uni boshqa xarajatlariga ishlatib, yotoqxonaga pul to‘lashmaydi.
Agar talabaning amaliyoti Toshkentda bo‘lsa, uning yotoqxonada qolishiga hech kim qarshi emas. Ammo amaliyotga bormay, tajriba orttirmay, uch oydan oshiqroq behuda vaqtini o‘tkazishi yaxshi emas, — deydi O‘zbekiston davlat sanʼat va madaniyat instituti rektori vazifasini bajaruvchi Eldor Shermanov.
Izoh (0)