Senatning elliginchi yalpi majlisida senatorlar tomonidan “O‘zbekiston Respublikasining Ma’muriy javobgarlik to‘g‘risidagi kodeksiga yong‘inlar profilaktikasi samaradorligini oshirishga qaratilgan qo‘shimcha va o‘zgartirishlar kiritish haqida”gi qonun ko‘rib chiqildi.
Ta’kidlanganidek, 2023-yilda 10 ming 204 ta yong‘in hodisasi yuz berib, unda 251 nafar fuqaro jabrlangan, shundan 79 nafari vafot etgan, jismoniy va yuridik shaxslarga esa 270,4 milliard so‘mlik zarar yetkazilgan.
Qonun bilan Ma’muriy javobgarlik to‘g‘risidagi kodeksda o‘rmonlarda yong‘in xavfsizligi talablarini buzish, agar yong‘in chiqishiga olib kelgan bo‘lsa, ma’muriy javobgarlikni belgilash ko‘zda tutilmoqda. Bunda ma’muriy huquqbuzarlik sodir etgan shaxs kodeksning 38-moddasiga muvofiq ma’muriy huquqbuzarlik oqibatida keltirilgan zararni qoplashdan ozod etilmaydi.
Shuningdek, Ma’muriy javobgarlik to‘g‘risidagi kodeksga o‘zgartirishlar kiritilib, yong‘in xavfsizligi qoidalarini buzgan huquqbuzarliklarga nisbatan qo‘llanadigan jazo sanksiyalarini oshirish ko‘zda tutilmoqda.
Ma’lum qilinishicha, 2018—2022-yillarda respublika o‘rmon xo‘jaliklarida jami 40 ta yong‘in hisobga olinib, natijada 431 gektar o‘rmonzorlarga jiddiy ziyon va 20,296 milliard so‘mdan ziyod zarar yetgan.
Senat raisi Tanzila Norboyevaning ta’kidlashicha, kelgusida bu kabi salbiy holatlarning oldini olish maqsadida Ma’muriy javobgarlik to‘g‘risidagi kodeksga qo‘shimchalar kiritilib, unga ko‘ra, o‘rmonda yong‘in xavfsizligi talablarini buzish oqibatida yong‘in chiqishiga olib kelsa, fuqaro bazaviy hisoblash miqdorining 10 baravaridan 15 baravarigacha, mansabdor shaxs esa 20 baravaridan 25 baravarigacha jarimaga tortiladi.
Amaldagi qonunchilikda odamlarning sog‘lig‘iga yoxud o‘zganing mol-mulkiga zarar yetmagan bo‘lishiga qaramasdan, shaxsning ehtiyotsizligi yoki yong‘in xavfsizligi qoidalarini buzganligi tufayli yong‘in sodir bo‘lganda huquqbuzarning ijtimoiy himoyasini ta’minlovchi norma mavjud emas edi.
Bu esa amaliyotda muayyan qiyinchiliklarni va huquqbuzarga nisbatan jazo choralarini qo‘llash holatlarining sodir etilishiga olib kelayotgan edi.
Endilikda kodeksga kiritilayotgan qo‘shimcha bilan fuqaroning aybi bilan uy-joy fondida ro‘y bergan yong‘in o‘zgalarga va o‘zgalar mol-mulkiga zarar yetkazmaganda, bunday fuqarolarni javobgarlikdan ozod etish nazarda tutilmoqda, — dedi Senat raisi.
Qonun muhokamasida senator Tolibjon Madumarov bugungi kunda yong‘in xavfsizligi qoidalarini buzgan huquqbuzarlarga nisbatan qo‘llanayotgan yengil jazo choralari kutilayotgan natijani bermayotganini aytib o‘tdi.
Birgina misol, 2023-yil 12-iyun kuni Farg‘ona viloyatining Qo‘qon shahridagi “Rizq baraka savdo kompleksi”, “Qo‘qon istiqlol savdo kompleksi”, “Buyuk ipak yo‘li savdo kompleksi” va “Qo‘qon savdo kompleksi” MCHJlarga qarashli savdo komplekslari va ularga tutash qurilgan hamda savdo shoxobchalari sifatida foydalanib kelingan 10 ta aholi yashash xonadonlari 950 metr kvadrat maydonda yongan.
To‘rtala savdo komplekslarida ham yong‘indan oldin biznes-ombudsmanini xabardor qilgan holda tekshiruvlar o‘tkazilgan, obyekt rahbarlariga davlat yong‘in nazoratining yozma ko‘rsatmalari taqdim etilgan va har birida rahbar hamda mas’ul shaxslarga nisbatan kodeksning 211-moddasiga muvofiq ma’muriy choralar qo‘llangan, — dedi Tolibjon Madumarov.
Favqulodda vaziyatlar vazirining birinchi o‘rinbosari Sanjar Zufarovning alohida ta’kidlashicha, hukumat komissiyasi sodir bo‘layotgan yong‘inlarni joyiga chiqib o‘rganib kelib, shunday xulosa qildiki, davlat yong‘in nazorati inspektorlari tomonidan berilayotgan jazo choralari yetarli emasligi natijasida shunday holatlar sodir bo‘lmoqda.
Bir hafta avval Andijon viloyatidagi Shahrixon bozorida yong‘in sodir bo‘ldi. Agar bozordagi tadbirkorlar Qo‘qon bozorida bo‘lgan yong‘indan xulosa chiqarishganida edi, bunday holat takrorlanmas edi, — dedi FVV vakili.
Senatorlar “O‘zbekiston Respublikasining Ma’muriy javobgarlik to‘g‘risidagi kodeksiga yong‘inlar profilaktikasi samaradorligini oshirishga qaratilgan qo‘shimcha va o‘zgartirishlar kiritish haqida”gi qonunni ma’qulladi.
Izoh (0)