Toshkent shahar ekologiya boshqarmasi boshlig‘i Farhod Dehqonovning faoliyatiga xizmat tekshiruvi tayinlandi va u 2023-yilning 30-dekabridan 2024-yilning 1-fevraliga qadar ishdan chetlashtirildi. Bu haqda Ekologiya, atrof-muhitni muhofaza qilish va iqlim o‘zgarishi vazirligi axborot xizmati ma’lum qildi.
Ijtimoiy tarmoqlarda Toshkent shahri Yunusobod tumanida bir dona eman daraxtiga quruvchilar tomonidan shikast yetkazilayotgani haqida xabarlar tarqalgandi.
Toshkent shahar ekologiya boshqarmasi tomonidan o‘rganish ishlari olib borilganida “Max Processing” MCHJ mansabdor shaxslari tomonidan 1 dona eman daraxti tegishli agrotexnik talablarga amal qilinmasdan Toshkent viloyati O‘rtachirchiq tumaniga ko‘chirib o‘tqazilgani aniqlandi. Ayni damda mazkur holat yuzasidan Toshkent shahar prokuraturasi tomonidan “Max Processing” MCHJ mansabdor shaxslari va boshqalarga nisbatan Jinoyat Kodeksining 198-moddasi 3-qismi (ekinzorlarni, o‘rmon, daraxtlarni yoki boshqa o‘simliklarni qasddan shikastlantirish, payhon qilish, nobud qilish ko‘p miqdorda zarar yetkazilish) va 229-moddasi (o‘zboshimchalik) bilan jinoyat ishi qo‘zg‘atilgan.
Ekologiya, atrof-muhitni muhofaza qilish va iqlim o‘zgarishi vazirining tegishli buyrug‘iga asosan, Mehnat kodeksining 151, 153-moddalariga ko‘ra Toshkent shahar ekologiya boshqarmasi boshlig‘ining faoliyatiga xizmat tekshiruvi tayinlandi va Farhod Dehqonov 2023-yilning 30-dekabridan 2024-yilning 1-fevraliga qadar ishdan chetlashtirildi.
Vazirning buyrug‘iga asosan, xizmat tekshiruvi davomida Toshkent shahar ekologiya boshqarmasining barcha tarkibiy bo‘linmalari rahbarlari, xodimlarining faoliyati hamda 2021–2023-yillar davomida boshqarma tomonidan davlat o‘rmon fondiga kirmaydigan yerlarda daraxtlar va butalarni kesishga berilgan ruxsatnomalarning qonuniyligi va asoslari o‘rganiladi.
Ta’kidlash joizki, poytaxtda moratoriy talablariga to‘liq rioya etilmayotganligi, aholi tomonidan daraxtlarning kesilishi borasida ko‘plab e’tirozlar bildirilayotganligi, qonunchilikka amal qilinmasdan daraxtlarni kesishga yoki ko‘chirishga qayta-qayta ruxsatnoma berilayotganligi sababli Ekologiya vazirligi shu yilning 1-fevraliga qadar Toshkent shahar ekologiya boshqarmasi vakolatlarini cheklashiga to‘g‘ri keldi, — deyiladi vazirlik axborotida.
Qo‘shimcha qilinishicha, endilikda daraxtlarni kesish yoki ko‘chirib o‘tqazishga ruxsatnoma berish faqatgina vazirlikning tegishli boshqarmasi bilan kelishilgan holda amalga oshiriladi.
Birinchi hibs
Toshkent shahri Chilonzor tumanida 58 tup daraxt kesilishi ortidan Toshkent shahar ekologiya va atrof-muhitni muhofaza qilish boshqarmasi boshlig‘i Farhod Dehqonov 9-sentyabr kuni hibsga olingandi. U Jinoyat kodeksining 205-moddasi 2-qismi ‘‘a’’ bandida (hokimiyat yoki mansab vakolatini suiiste’mol qilish, davlat yoki jamiyatga juda ko‘p miqdorda zarar yetkazish) nazarda tutilgan jinoyatni sodir etganlikda gumonlangan.
Bu voqea jamoatchilik orasida norozilik keltirib chiqardi. Daraxtlar kesilishiga asosiy sababchilar — o‘sha hududda qurilish qilishga ruxsat berganlar chetda qolib, ekologlar bosh aybdor qilingani jamoatchilik vakillarini norozi qilgandi.
Oradan bir kun o‘tganidan so‘ng Farhod Dehqonov qo‘yib yuborilgani haqida xabar berilgandi. Holat Prezident administratsiyasining sobiq rahbari Sardor Umurzoqov nazoratiga olingani aytilgan edi.
Keyinchalik mazkur jinoyat ishining yakuni bo‘yicha ma’lumot berilmagan. Ekologiya, atrof-muhitni muhofaza qilish va iqlim o‘zgarishi vazirligi axborot xizmatining ‘‘Daryo’’ga ma’lum qilishicha, Farhod Dehqonov o‘z ishida davom etgan.
Izoh (0)