Poytaxtda daraxtlar kesilishi davom etayotgani sababli Toshkent shahar ekologiya boshqarmasi vakolatlari 1-fevralga qadar cheklandi. Bu haqda Ekologiya, atrof-muhitni muhofaza qilish va iqlim o‘zgarishi vazirligi matbuot xizmat xabar berdi.
Ta’kidlanishicha, poytaxtda moratoriy talablariga to‘liq rioya etilmayotgani, aholi tomonidan daraxtlarning kesilishi borasida ko‘plab eʼtirozlar bildirilayotgani, qonunchilikka amal qilinmasdan daraxtlarni kesishga yoki ko‘chirishga qayta-qayta ruxsatnoma berilayotgani sababli Ekologiya vazirligi 2024-yilning 1-fevraliga qadar Toshkent shahar ekologiya boshqarmasi vakolatlarini cheklashiga to‘g‘ri keldi.
Shuningdek, Toshkent shahar ekologiya boshqarmasi boshlig‘i faoliyatiga xizmat tekshiruvi tayinlandi va u 2024-yilning 1-fevraliga qadar ishdan chetlashtirildi.
Vazirning buyrug‘iga asosan xizmat tekshiruvi davomida boshqarmaning barcha tarkibiy bo‘linmalari rahbarlari, xodimlarining faoliyati hamda 2021–2023-yillar davomida boshqarma tomonidan davlat o‘rmon fondiga kirmaydigan yerlarda daraxtlar va butalarni kesishga berilgan ruxsatnomalarning qonuniyligi va asoslari o‘rganiladi.
Vazirlik Toshkentning Yunusobod tumanida eman daraxtiga quruvchilar tomonidan shikast yetkazilgani haqida taralgan xabarlar bo‘yicha ham munosabat bildirdi.
Ma’lum qilinishicha, Toshkent shahar ekologiya boshqarmasi tomonidan o‘rganish ishlari olib borilganida Max Processing MCHJ mansabdor shaxslari tomonidan bir dona eman daraxti tegishli agrotexnik talablarga amal qilinmasdan Toshkent viloyati O‘rtachirchiq tumaniga ko‘chirib o‘tqazilgani aniqlangan.
Ayni damda mazkur holat yuzasidan Toshkent shahar prokuraturasi tomonidan Max Processing MCHJ mansabdor shaxslari va boshqalarga nisbatan Jinoyat kodeksining 198-moddasi (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) 3-qismi va 229-moddasi (o‘zboshimchalik) bilan jinoyat ishi qo‘zg‘atilgan.
Izoh (0)