Armaniston Gaagadagi Xalqaro jinoiy sudga rasman qo‘shildi. “Armanistonda XJSning Rim statuti 1-fevraldan kuchga kirdi”, dedi bosh vazirning xalqaro huquqiy masalalar bo‘yicha vakili Yegishe Kirokosyan.
“XJSga qo‘shilish Armanistonga o‘z hududida urush jinoyatlari va insoniyatga qarshi jinoyatlarning oldini olish imkoniyatini beradi”, — ta’kidladi Kirakosyan.
Uning so‘zlariga ko‘ra, bu birinchi navbatda Ozarbayjonga taalluqli.
Putin Armanistonga borsa hibsga olinishi mumkin
Bu qadam Armaniston Rossiya prezidenti Vladimir Putinni mamlakatga tashrif buyurgan taqdirda Gaaga sudi orderi asosida hibsga olishi mumkinligini ham anglatadi. Ilgari Rossiya Armanistonni Rim statutiga qo‘shilish istagida keskin tanqid qilib, buni “do‘stona bo‘lmagan harakat” deb atagandi. O‘z navbatida, hukumat rahbari Nikol Pashinyan bu bayonotlarga javoban Armanistonning harakatlari Moskvaga qarshi emasligini bir necha bor ta’kidlagan.
Xalqaro jinoiy sud 2023-yil mart oyida Putinni Rossiya tomonidan bosib olingan Ukraina viloyatlaridan minglab bolalarni deportatsiya qilishda gumon qilib, hibsga olishga order bergandi. Rossiya XJSni tan olmaydi. Rossiya hukumati Rossiya prezidentini hibsga olishga order bergani uchun XJSning bir necha sudyalarini qidiruvga bergan
Rossiya Qorabog‘ mojarosida Armanistonga yordam bermagandi
Rossiya va Armaniston o‘rtasidagi taranglik, jumladan, Tog‘li Qorabog‘dagi Armaniston—Ozarbayjon mojarosida Moskvaning roli tufayli kuchaygan. Ozarbayjonning Qorabog‘dagi harbiy amaliyotini qaytarishda Moskva hech qanday yordam ko‘rsatmagan paytda Armaniston yaqin vaqtgacha Yerevanning asosiy ittifoqchisi bo‘lgan Rossiya unga “xiyonat qildi” deb hisoblaydi.
Ozarbayjon Qorabog‘ni o‘z nazoratiga qaytarish uchun o‘tgan yilning 19-sentyabrida katta operatsiya boshladi va bir kun ichida mintaqaning armanparast hukumati taslim bo‘lib, tan olinmagan Tog‘li Qorabog‘ respublikasi tugatilganini eʼlon qildi. Mintaqaning aksariyat aholisi armanlar edi, ammo sentyabr voqealaridan keyin 120 ming armanning katta qismi Ozarbayjon hukumatining repressiyalaridan qo‘rqib, Qorabog‘ni tark etdi.
Izoh (0)