Арманистон Гаагадаги Халқаро жиноий судга расман қўшилди. “Арманистонда ХЖСнинг Рим статути 1 февралдан кучга кирди”, деди бош вазирнинг халқаро ҳуқуқий масалалар бўйича вакили Егише Кирокосян.
“ХЖСга қўшилиш Арманистонга ўз ҳудудида уруш жиноятлари ва инсониятга қарши жиноятларнинг олдини олиш имкониятини беради”, — таъкидлади Киракосян.
Унинг сўзларига кўра, бу биринчи навбатда Озарбайжонга тааллуқли.
Путин Арманистонга борса ҳибсга олиниши мумкин
Бу қадам Арманистон Россия президенти Владимир Путинни мамлакатга ташриф буюрган тақдирда Гаага суди ордери асосида ҳибсга олиши мумкинлигини ҳам англатади. Илгари Россия Арманистонни Рим статутига қўшилиш истагида кескин танқид қилиб, буни “дўстона бўлмаган ҳаракат” деб атаганди. Ўз навбатида, ҳукумат раҳбари Никол Пашинян бу баёнотларга жавобан Арманистоннинг ҳаракатлари Москвага қарши эмаслигини бир неча бор таъкидлаган.
Халқаро жиноий суд 2023 йил март ойида Путинни Россия томонидан босиб олинган Украина вилоятларидан минглаб болаларни депортация қилишда гумон қилиб, ҳибсга олишга ордер берганди. Россия ХЖСни тан олмайди. Россия ҳукумати Россия президентини ҳибсга олишга ордер бергани учун ХЖСнинг бир неча судьяларини қидирувга берган
Россия Қорабоғ можаросида Арманистонга ёрдам бермаганди
Россия ва Арманистон ўртасидаги таранглик, жумладан, Тоғли Қорабоғдаги Арманистон—Озарбайжон можаросида Москванинг роли туфайли кучайган. Озарбайжоннинг Қорабоғдаги ҳарбий амалиётини қайтаришда Москва ҳеч қандай ёрдам кўрсатмаган пайтда Арманистон яқин вақтгача Ереваннинг асосий иттифоқчиси бўлган Россия унга “хиёнат қилди” деб ҳисоблайди.
Озарбайжон Қорабоғни ўз назоратига қайтариш учун ўтган йилнинг 19 сентябрида катта операция бошлади ва бир кун ичида минтақанинг арманпараст ҳукумати таслим бўлиб, тан олинмаган Тоғли Қорабоғ республикаси тугатилганини эълон қилди. Минтақанинг аксарият аҳолиси арманлар эди, аммо сентябрь воқеаларидан кейин 120 минг арманнинг катта қисми Озарбайжон ҳукуматининг репрессияларидан қўрқиб, Қорабоғни тарк этди.
Изоҳ (0)