Ukraina armiyasi bahorda yangi qarshi hujumga o‘tadi, dedi Ukraina Mudofaa vazirligi razvedka boshqarmasi boshlig‘i Kirill Budanov 31-yanvar kuni The Telegraph gazetasiga.
“Bu vaqtga kelib Rossiyaning hozirgi hujumi butunlay barham topadi, keyin navbat bizga keladi”, — dedi u.
Gazeta ta’kidlashicha, dastlabki qarshi hujumi tugagandan so‘ng, Ukraina Rossiya hujumlarini qaytarish bilan “faol mudofaa”ga o‘tgan va kuchli mudofaa istehkomlarini qurmoqda.
Budanovning so‘zlariga ko‘ra, Rossiya qo‘shinlari Ukraina sharqini bosib olish harakatlaridan voz kechmayapti. Xususan, ular bir vaqtning o‘zida Kupyansk, Liman, Baxmut va Avdeyevka hududlarida hujum amaliyotlarini o‘tkazmoqda.
Ukraina harbiy razvedkasi boshlig‘i ruslar Avdeyevkada “muayyan muvaffaqiyatlarga” erishganini tan oldi, ammo “bu dushman armiyasining umidlarini oqlamasligini” ta’kidladi.
“Rossiyada infratuzilmaga hujumlar kuchayishi mumkin”
Bundan tashqari, Amerikaning CNN telekompaniyasiga bergan intervyusida Budanov 2024-yilda Rossiyada infratuzilma obyektlariga hujumlar kuchayishi mumkinligini aytdi. Biroq u Rossiyaga uyushtirilgan dronlar hujumiga Kiyevning aloqadorligini bevosita tan olmadi. Budanov “Rossiya Federatsiyasining barcha asosiy muhim infratuzilma obyektlari va harbiy infratuzilma obyektlarini o‘z ichiga olgan” gipotetik reja haqida gapirdi. Uning so‘zlariga ko‘ra, rossiyaliklar endi urushning haqiqiy manzarasi – yonayotgan neft bazalari, vayron bo‘lgan zavod binolariga guvoh bo‘lmoqda.
Izoh (0)