Armaniston parlamenti Gaagadagi Xalqaro jinoiy sudning Rim statutini ratifikatsiya qilish uchun ovoz berdi, deb xabar bermoqda Meduza.
Armenpress xabariga ko‘ra, hujjatni ratifikatsiya qilish uchun 60 deputat “ha”, 22 deputat “yo‘q” ovozini berdi. Endi uni prezident imzolashi kerak.
Arman muxolifati ovoz berishni boykot qildi: xususan, “Armaniston” bloki kotibi Atsrvik Minasyan ratifikatsiya loyihasi go‘yoki Armaniston konstitutsiyasiga zid ekanligini aytdi. Shu bilan birga, mamlakat Konstitutsiyaviy sudi buning mutlaqo aksini ta’kidlagan.
Armaniston 1998-yilda Rim statutini imzolagan, biroq hujjat Armaniston konstitutsiyasiga zid deb topilgach, ratifikatsiya jarayoni 2004-yilda to‘xtatilgan. 2022-yil oxirida Armaniston hukumati jarayonni tikladi.
Rossiya Armanistonda Rim statuti ratifikatsiya qilinishiga faol qarshi chiqdi — ular XJS Vladimir Putin va Mariya Lvova-Belovani hibsga olishga order bergan bir paytda Yerevanning bunday qarorini nomaqbul deb ataldi.
O‘z navbatida, Armaniston hukumati nizomni ratifikatsiya qilish xavfsizlik masalalari tufayli zarur ekanini asoslab berdi:
“Mamlakatimizga qarshi harbiy jinoyatlar sodir etilgan va etilmoqda. Bizga, mamlakatimizga, bu (ratifikatsiya) kerak”, — degan parlament spikeri Alyon Simonyan sentyabr boshida.
Rim statuti Xalqaro jinoiy sudni tashkil etuvchi shartnomadir. Uni 137 davlat imzolagan, 120 dan ortiq davlat ratifikatsiya qilgan.
XJS Putin va Lvova-Belovani hibsga olish orderini 2023-yil mart oyida bergan. Ular ukrainalik bolalarni bosib olingan hududlardan noqonuniy olib chiqib ketishda gumonlanmoqda.
Izoh (0)