Yevropa Ittifoqi davlatlari bir yil oldin va’da qilingan millionta snaryaddan atigi 500 mingdan ko‘prog‘ini Ukrainaga mart oyigacha yetkazib beradi. Bu haqda Yevropa diplomatiyasi rahbari Jozep Borrel YI mudofaa vazirlari yig‘ilishidan so‘ng o‘tkazilgan brifingda ma’lum qildi.
“O‘tgan yili Yevropa Ittifoqi davlatlari bir yil ichida Ukrainaga bir million snaryad yetkazib berishni va’da qilgandi. Aʼzo mamlakatlardan olingan so‘nggi maʼlumotlarga ko‘ra, o‘tgan yilning mart oyidan hozirgacha 330 ming snaryad yetkazib berdik – bu maqsadimizning uchdan bir qismidir. Mart oyiga qadar yana 200 ming dona yetkazib berilishi kutilmoqda. Ularning umumiy soni 530 mingga yetadi, bu maqsadning 50 foizdan sal ko‘proqni tashkil etadi”, — dedi Borrel.
Yevropa diplomatiyasi rahbarining taʼkidlashicha, butun “Yevropa mudofaa mashinasi” yil oxirigacha YI davlatlari Ukrainaga bir milliondan ortiq snaryad o‘tkazish imkoniyatiga ega bo‘lishini taʼminlash ustida ishlamoqda.
Borrel, shuningdek, Yevropa Ittifoqi davlatlari 2024-yilda Ukrainaga yordam berish uchun allaqachon 21 milliard yevro va’da qilganini aytdi. Uning so‘zlariga ko‘ra, bu minimal ko‘rsatkich, chunki hali a’zo davlatlarning hammasi ham Kiyevni qo‘llab-quvvatlash rejalari haqida ma’lumot bermagan.
2023-yil mart oyida Yevropa Ittifoqi Ukrainaga 12 oy ichida avval mavjud zaxiralardan, so‘ngra qo‘shma xarid shartnomalari va sanoat quvvatini oshirish orqali bir million artilleriya snaryadlarini yetkazib berishga va’da bergandi.
Noyabr oyida Bloomberg YI o‘z va’dasini bajarishi dargumon, deb yozdi. Ukraina tashqi ishlar vaziri Dmitriy Kuleba Yevropa Ittifoqi “mudofaa sanoatining ayanchli ahvoli” tufayli 2024-yilning martiga qadar bir millionta artilleriya snaryadlarini yetkazib bera olmasligini tasdiqladi.
Yanvar oyi boshida Jozep Borrel boshchiligidagi Yevropa tashqi harakatlar xizmati Yevropa Ittifoqiga aʼzo davlatlarning Ukrainaga harbiy yordami auditini tekshirishni boshladi, deb yozadi Financial Times. Tekshiruv qarori Germaniya kansleri Olaf Sholsning Yevropa davlatlarining Kiyevga harbiy yuklarini solishtirishni talab qilgan bayonotidan keyin qabul qilindi.
Yevropaning beshta davlati – Germaniya, Daniya, Chexiya, Estoniya va Niderlandiya yetakchilari Yevropa Ittifoqining boshqa davlatlariga ochiq xat yozib, ularni Ukrainani qurollantirish bo‘yicha jamoaviy sa’y-harakatlarni amalga oshirishga, shuningdek, o‘q-dorilar yetkazib berishni osonlashtiradigan tashabbuslarni moliyalashtirishga chaqirdi.
Izoh (0)