Yevropada xavfsizlik va hamkorlik tashkiloti raisi, Malta tashqi ishlar vaziri Yan Borgning aytishicha, tashkilotga aʼzo davlatlarni chiqarib yuborish mexanizmlari yo‘q.
U Rossiya tashkilotdan chiqarib yuborilishi mumkinligi haqidagi savolga javob berar ekan, bu ishni amalga oshirib bo‘lmasligini ta’kidlagan.
“Bu tashkilotning o‘z qoidalari bor, a’zo davlatlarni chiqarib yuborish mexanizmlari yo‘q”, — dedi Borg.
2023-yilning 1-dekabrida Yevropada xavfsizlik va hamkorlik tashkilotining o‘sha paytdagi raisi, Shimoliy Makedoniya tashqi ishlar vaziri Bujar Usmoniy Rossiyaning tashkilotdan chiqarilishi haqidagi munozaralar tugaganini aytgandi. Uning so‘zlariga ko‘ra, YXHTda qarama-qarshi fikrlar bildiruvchi davlatlar o‘rtasida muloqotni davom ettirish kerak.
Usmoniyning so‘zlariga ko‘ra, Rossiyani YXHTdan chiqarish haqidagi munozara mamlakat tashkilotning asosiy tamoyilini (Ukraina hududiga qo‘shin kiritish) buzgani sababli boshlangan. Xususan, “konsensus minus bir” tamoyilidan foydalanish taklif etilgan.
YXHT bundan oldin faqat bir marta ushbu tamoyildan foydalangan: 1992-yilda Yugoslaviya harbiy harakatlar paytida inson huquqlarini ommaviy ravishda buzgani uchun tashkilotdan chiqarib yuborilgan.
Izoh (0)