Yevropada Xavfsizlik va Hamkorlik Tashkilotining (YXHT) Ashxoboddagi vakolatxonasi Turkmaniston poytaxtida bojxona mexanizmlarini modernizatsiya qilish va eksport tartib-qoidalarini takomillashtirish masalalariga bag‘ishlangan seminar o‘tkazganini xabar qildi. Tadbirda bojxonachilar, moliyachilar, bankirlar, tadbirkorlar, Turkmanboshi xalqaro dengiz porti vakillari ishtirok etdi.
YXHTning mahalliy markazi rahbari Jon Makgregor yig‘ilganlarga murojaat qildi:
“YXHT mintaqaviy va xalqaro iqtisodiy aloqalarni saqlab qolish va yanada rivojlantirish, jumladan, savdoni osonlashtirish, iqtisodiy rivojlanish va o‘sishni jadallashtirish, qo‘shilgan qiymatga ega mahsulotlar eksportini diversifikatsiya qilish va pirovardida mintaqaviy diversifikatsiyalangan iqtisodiyotlarni barpo etish orqali ortib borayotgan ehtiyojni qondirishga katta ahamiyat bermoqda”.
Tadbirda jahon savdosini tartibga solish standartlari, erkin iqtisodiy zonalarda bojxona nazorati, eksport hujjatlari va “yagona darcha” loyihasi haqida so‘z yuritildi.
Bundan tashqari, kun tartibidan bojxona tartib-qoidalarini raqamlashtirish, port hamjamiyati tizimini rivojlantirish va Jahon savdo tashkilotining (JST) tarif siyosati kabi masalalar ham o‘rin olgan.
Quruqlikda Turkmaniston Afg‘oniston, Eron, Qozog‘iston va O‘zbekiston bilan chegaradosh. Kaspiy dengizida mamlakat Ozarbayjon, Eron, Qozog‘iston va Rossiya bilan chegaraga ega.
Izoh (0)