Belgorod viloyatida halokatga uchragan Rossiyaning Il-76 samolyoti bortida rossiyalik amaldorlar bo‘lishi kerak edi, biroq so‘nggi lahzada FSB (Federal xavfsizlik xizmati) ularga samolyotga chiqishni taqiqlagan. Bu haqda Ukraina razvedkasining rasmiy vakili Andrey Yusov xabar berdi.
“Haqiqatan ham bortda agressor davlatning harbiy-siyosiy vakolatxonasidan bir nechta rasmiy VIP personalar bo‘lishi kerak edi. Ularning ismlari ma’lum va e’lon qilinadi, xalqaro tergov doirasida materiallar taqdim etiladi. Ammo so‘nggi daqiqada FSB haqiqatda ularga bu bortga chiqmaslikni va boshqa transport turlaridan foydalanishni buyurgan. Bu ma’lumotlar voqea sodir bo‘lganidan keyin aniqlangan”, — deydi Yusov.
Shuningdek, u rossiyalik qutqaruvchilarga halokat joyini tekshirishga ruxsat berilmaganini aytdi.
“Voqea joyiga yetib kelgan Rossiya Favqulodda vaziyatlar vazirligi vakillari FSB va harbiylar tomonidan haqiqatda chiqarib yuborilgan va ularga protokolga ko‘ra, voqea joyida tekshiruv o‘tkazish imkoniyati berilmagan”, — dedi Ukraina Bosh razvedka boshqarmasi vakili.
Bundan tashqari, u halokat joyidan olingan videoda inson jasadlari qoldiqlari ko‘rsatilmagani va halokat kuni Belgoroddagi mahalliy o‘likxonaga faqat beshta jasad yetkazilganini ma’lum qildi.
Belgorodda Il-76 halokati
24-yanvar kuni Rossiyaning Belgorod viloyatida Il-76 samolyoti halokatga uchradi. Rossiya Mudofaa vazirligining da’vo qilishicha, bortda 74 kishi bo‘lgan: 65 nafar ukrainalik harbiy asir, uch nafar rus askari va olti nafar ekipaj a’zosi. Rossiya rasmiylariga ko‘ra, ularning barchasi vafot etgan.
Rossiya Mudofaa vazirligi Il-76 halokatini terakt deb atadi va bunda Ukraina harbiylarini aybladi. Ukraina hukumati halokat uchun javobgarlikni o‘z zimmasiga olmadi, ammo samolyot halokatida Rossiyani ayblamadi ham. “Ukrainskaya pravda” nashri Ukraina Qurolli kuchlaridagi manbalarga tayanib, ruslar Il-76 da Xarkovga tez-tez o‘q uzadigan S-300 havo mudofaa tizimi uchun raketalarni tashiganini ma’lum qildi.
Keyinchalik, Ukraina razvedkasi 24-yanvar kuni mahbuslar almashinuvi bo‘lishi kerakligini tasdiqladi, ammo bu jarayon to‘xtatildi. Ukraina tomonida Il-76 bortida kim bo‘lgani haqida ishonchli ma’lumotlar yo‘qligini qo‘shimcha qildi. Rossiya aviahalokatda paytida halok bo‘lgan 65 nafar ukrainalik asirlar ro‘yxatini e’lon qildi. Biroq ukrainalik jurnalistlarga ko‘ra, ro‘yxatdagi kamida 17 kishi 3-yanvar kuni asirlar almashinuvi doirasida vataniga qaytgan.
O‘z navbatida, Rossiya asirlar qaysi yo‘nalishda, transportda va necha kishi bo‘lgani haqida Ukrainani ogohlantirmagan. Avvalgi asirlar almashinuvida ruslar ukrainlarni bu borada ogohlantirib kelgandi. Ukraina Xavfsizlik xizmati Il-76 samolyotining halokatga uchrashi bo‘yicha tergov boshlagan.
Izoh (0)