Saudiya Arabistonida 70 yildan ortiq vaqt ichida birinchi marta spirtli ichimliklar do‘koni ochildi. Bu haqda anonim diplomatga tayanib, Associated Press xabar berdi.
Ma’lum qilinishicha, Ar-Riyoddagi ushbu do‘konga faqat musulmon bo‘lmagan diplomatlar kirishi mumkin. Bu Saudiya Arabistoni valiahd shahzodasi Muhammad bin Salmonning qirollikni turizm va biznes uchun jozibador qilish borasidagi sa’y-harakatlari fonida amalga oshirilmoqda.
“Bu qadamlar uning mamlakat iqtisodini neftga qaramlikdan bosqichma-bosqich qutqarish bo‘yicha ulkan rejalariga mos keladi”, — deyiladi xabarda.
Do‘kon Ar-Riyodning diplomatik kvartalidagi supermarketga yaqin joyda joylashgan. Do‘konda alkogolli ichimliklar, jumladan, likyorlar, vinolar va hozirda faqat ikki turdagi pivo taklif etiladi. Xarid qilish uchun tashrif buyuruvchilardan diplomatik identifikatsiya kartalari va mobil telefonlarini maxsus sumkalarga solib qo‘yish so‘raladi.
Saudiya Arabistoni rasmiylari do‘kon ochilishiga izoh berishdan bosh tortgan. Uzoq vaqt davomida diplomatlar alkogolli ichimliklarni diplomatik maqsadlarda foydalanish maqsadida qirollikka maxsus xizmat orqali olib kirgan edi.
Saudiya Arabistonida spirtli ichimliklarga qo‘yilgan taqiq
Saudiya Arabistoni qo‘shni Kuvayt va Birlashgan Arab Amirliklarining Sharja shahriga o‘xshab, spirtli ichimliklarni to‘liq taqiqlagan dunyodagi sanoqli davlatlardan biri bo‘lib qolmoqda.
1950-yillarda Saudiya Arabistoni monarxiyasi asoschisi qirol Abdulaziz 1951-yilda sodir bo‘lgan voqeadan so‘ng spirtli ichimliklarni taqiqlashni joriy qildi. Qirolning o‘g‘illaridan biri shahzoda Mishari mast holda Jidda shahrida Britaniya vitse-konsuli Siril Usmonni tasodifan qurol bilan o‘ldirgan.
Mishari umrbod qamoq jazosiga hukm qilingan va qamoqqa tashlangan, o‘z maqomi bilan o‘lim jazosidan qutqarilgan. Mishari qirol Saud davrida qamoqdan ozod qilingan.
Ozodlikka chiqqandan so‘ng u AQSH va Buyuk Britaniyaga ketgan va u yerda 1973-yilgacha aviatsiya bo‘yicha tahsil olgan va Saudiya Arabistoni tarixidagi birinchi uchuvchiga aylangan.
Shahzoda Mishari 2000-yil 23-mayda Nyu-Yorkda 68 yoshida vafot etgan. U qirollik oilasining bir qancha aʼzolari va taniqli shaxslari kabi Al-Adl qabristoniga dafn qilingan.
Izoh (0)