YXHT DIIHB missiyasi rahbari Ursula Gachek OAV vakillariga bergan intervyusida O‘zbekiston prezidenti saylovi jarayonlarini sinchiklab tahlil qilishga asosiy diqqat-eʼtibor qaratilishini aytdi.
Uning qayd etishicha, O‘zbekiston prezidenti saylovlarida 250 nafar xalqaro kuzatuvchi ishtirok etmoqda. Kuzatuvchilar Taxtako‘pir singari eng olis hududlarda ham ish olib boryapti.
“Butun ishimizni umumlashtirib aytadigan bo‘lsam, biz qatʼiy belgilangan, aniq metodologiyaga, yuz berayotgan jarayonlarni to‘liq qamrab olishga va sinchiklab tahlil qilishga asosiy diqqat-eʼtiborimizni qaratamiz”, — deydi Ursula Gachek.
YXHT DIIHB missiyasi rahbarining ma’lum qilishicha, ular 4 ta turli jihatlarni kuzatmoqda. Kuzatuvchilar maxsus elektron ruchkalardan foydalanadi. Uning tugmachasini bosganda maʼlumotlar qabul qilib olinadi.
“Vakillarimiz uchastkalarda jarayon boshlanishidan bir soat avval kuzatuvga kirishdi va tayyorgarlik holatiga ham guvoh bo‘ldi. Kuzatuvchilar uchastkalarning ochilishiga tayyorgarlik jarayoni bo‘yicha yuzdan ortiq blankalarni to‘ldirib berishdi. Ushbu hujjatlar bizning statistika bilan shug‘ullanuvchi jamoamiz tomonidan o‘rganib chiqilmoqda”, — deydi YXHT DIIHB missiyasi rahbari.
Uning bildirishicha, kun davomida kuzatuvlarga doir mingga yaqin, balki undan ham ko‘p hisobotlar taqdim etiladi. Ular turli yo‘nalishlarga tegishli: byulletenlar, byulleten qutilari va ushbu muhim siyosiy jarayonning boshqa jihatlari.
“Biz barcha maʼlumotlarni onlayn rejimida berib boryapmiz va ular darhol tahlil qilinmoqda. Kech soat 8 dan keyin uchastkalar yopilgach, ovozlarni sanash ustidan kuzatuv davom ettiriladi. 14 ta okrug uchastkalaridagi jarayon ham kuzatuvlarda muhim o‘rin tutadi. Bunda, maʼlumotlarni Markaziy saylov komissiyasiga uzatib beruvchi okrug saylov komissiyalarining xatti-harakatlari tahlil qilinadi”, — dedi YXHT DIIHB missiyasi rahbari Ursula Gachek.
Ma’lumot uchun, 14 ta saylov okrugi va 10 ming 784 ta saylov uchastkasi tuzildi. Saylov jarayonini 47 ta davlat va 15 ta nufuzli xalqaro tashkilotdan jami 797 nafar xalqaro kuzatuvchi bevosita kuzatib bormoqda. Saylovda ovoz berish soat 08:00 dan 20:00 gacha o‘tkaziladi.
Izoh (0)