Navoiy va Surxondaryo viloyatlarida kredit mablag‘larini o‘zlashtirish holatlari aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Navoiy viloyati boshqarmasi tomonidan “Biznesni rivojlantirish banki” AT Navoiy filialining murojaatiga asosan tergovga qadar tekshiruv o‘tkazilgan. Teshiruv davomida “D.Q.” MCHJ masʼul shaxslari qurilish mahsulotlarini ishlab chiqarish uskunalarini xarid qilish uchun ushbu bank filialidan ajratilgan 800 million so‘m kredit evaziga uskunalarni to‘liq olib kelmasdan, kredit mablag‘larini o‘zlarining ehtiyojlariga sarflab yuborgani aniqlangan.
Shu kabi, departamentning Surxondaryo viloyati boshqarmasi tomonidan o‘tkazilgan tergovga qadar tekshiruvda “U.A.” xususiy korxonasi rahbari K.SH. va boshqalar AT “Xalq banki” Uzun filialidan aylanma mablag‘larni to‘ldirish maqsadida ajratilgan kredit mablag‘ini maqsadsiz ishlatib, jami 741,3 million so‘mni o‘zlashtirish yo‘li bilan talon-toroj qilgan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Surxondaryo viloyatining Oltinsoy va Termiz tumanlarida 11 milliard so‘mdan ortiq kredit mablag‘larini o‘zlashtirgan MCHJ rahbarlari aniqlangandi. Shuningdek, Surxondaryo va Farg‘onada oilaviy korxonalar rahbarlari 1,2 milliard so‘mdan ortiq imtiyozli kreditlarni talon-toroj qilgani to‘g‘risida xabar berilgan edi.
Izoh (0)