Навоийда 800 млн, Сурхондарёда эса 741 млн сўм кредит маблағларини ўзлаштириш ҳолатлари аниқланди 

Навоий ва Сурхондарё вилоятларида кредит маблағларини ўзлаштириш ҳолатлари аниқланди, деб хабар беради Бош прокуратура ҳузуридаги департамент.

Маълум қилинишича, департаментнинг Навоий вилояти бошқармаси томонидан “Бизнесни ривожлантириш банки” АТ Навоий филиалининг мурожаатига асосан терговга қадар текширув ўтказилган. Теширув давомида “Д.Қ.” МЧЖ масъул шахслари қурилиш маҳсулотларини ишлаб чиқариш ускуналарини харид қилиш учун ушбу банк филиалидан ажратилган 800 миллион сўм кредит эвазига ускуналарни тўлиқ олиб келмасдан, кредит маблағларини ўзларининг эҳтиёжларига сарфлаб юборгани аниқланган.

Шу каби, департаментнинг Сурхондарё вилояти бошқармаси томонидан ўтказилган терговга қадар текширувда “У.А.” хусусий корхонаси раҳбари К.Ш. ва бошқалар АТ “Халқ банки” Узун филиалидан айланма маблағларни тўлдириш мақсадида ажратилган кредит маблағини мақсадсиз ишлатиб, жами 741,3 миллион сўмни ўзлаштириш йўли билан талон-торож қилган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.

Аввалроқ Сурхондарё вилоятининг Олтинсой ва Термиз туманларида 11 миллиард сўмдан ортиқ кредит маблағларини ўзлаштирган МЧЖ раҳбарлари аниқланганди. Шунингдек, Сурхондарё ва Фарғонада оилавий корхоналар раҳбарлари 1,2 миллиард сўмдан ортиқ имтиёзли кредитларни талон-торож қилгани тўғрисида хабар берилган эди.