Davlat xavfsizlik xizmatining Samarqand viloyati bo‘yicha boshqarmasi xodimlari tomonidan o‘qotar qurolni noqonuniy ravishda sotmoqchi bo‘lgan shaxs ushlandi.
Ma’lum qilinishicha, Jomboy tumanida o‘tkazilgan tezkor tadbirda Toshkent shahrida yashovchi, muqaddam Jinoyat kodeksining 251-1 va 246-moddalari bilan sudlangan 47 yoshli shaxs xaridorga 1 dona “Makarov” pistoleti va uning 96 dona o‘q-dorisini 10 ming dollarga sotmoqchi bo‘lgan vaqtida ashyoviy dalillar bilan qo‘lga olingan.
Shuningdek, uning yashash xonadonida o‘tkazilgan tintuv harakatlari davomida foydalanishga yaroqli deb topilgan, kalibri 5,6 millimetr bo‘lgan eski rusumdagi “Monte Kristo” to‘pponchasi, turli xil gilzalar, ov miltig‘i qismlari, o‘tkir tig‘li jismlar hamda boshqa ashyoviy dalillar protsessual tartibda rasmiylashtirib olingan.
Hozirda mazkur shaxsga nisbatan Jinoyat kodeksining 248-moddasi (o‘qotar qurolning, o‘q-dorilarning, o‘qotar qurol asosiy qismlarining, portlovchi moddalarning, portlatish vositalarining yoki portlatish qurilmalarining qonunga xilof muomalasi) 3-qismi bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
Avvalroq “Yallama” chegara bojxona post xodimlari tomonidan O‘zbekistonda faoliyat olib borayotgan masʼuliyati cheklangan jamiyatlardan birining nomiga kuryerlik jo‘natmalari bojxona nazoratidan o‘tkazilganida uning ichidan pnevmatik to‘pponcha chiqqani to‘g‘risida xabar berilgandi.
Izoh (0)