Toshkent shahrida tadbirkorning 220 million so‘mlik mulkini o‘zlashtirgan sobiq hisobchi aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Yakkasaroy tuman bo‘limi tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazilgan. Tadbir davomida “L.P.” MCHJ sobiq hisobchisi F.M. MCHJ nomidan shartnoma tuzishga berilgan vakolatdan foydalanib, “H-P.” MCHJdan xarid qilingan 17,5 tonna metall mahsulotlarini kirim qilmasdan boshqa shaxslarga naqd pulga sotib yuborib, tadbirkorning 220 million so‘mlik mulkini o‘zlashtirish yo‘li bilan talon-toroj qilganligi aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkent shahar Mirobod tumanida majburiy badal va ijara uchun undirilgan mablag‘ni o‘zlashtirgan shirkat aniqlangani, Toshkent tumanida MCHJ mas’ullari 2,1 mlrd so‘mlik kredit va subsidiya mablag‘larini o‘zlashtirgani, Qoraqalpog‘istonda ko‘mir sotib olish uchun ajratilgan mablag‘larni talon-toroj qilgan MCHJ rahbariga jinoyat ishi ochilgani to‘g‘risida xabar berilgandi.
Izoh (0)