O‘zbekistonda xizmat ko‘rsatgan artist Rayhon G‘aniyeva har yili shou-konsert berib, muxlislarini xushnud etardi. Afsuski, bu yil so‘nggi konserti ekanligini aytgach, “Humo Arena” muz saroyida bo‘lishi rejalashtirilgan konsert dasturi qoldirilgandan keyin muxlislarda ko‘plab savollar paydo bo‘ldi. Konsert oldi xonanda bir guruh jurnalistlar qatori “Daryo” muxbirlarini ham tayyorgarlik jarayonlarini ko‘rishga taklif etdi. Konsert bahonasida ko‘plab savollarga javob berdi.
— Konsert bermayman, deganim ijoddan ketdim, degani emas. Hali ko‘p qo‘shiqlar aytaman, kliplar olishni ham rejalashtirib qo‘yganman. Konsert katta kuch va mehnat talab qiladi. Bundan tashqari, uni o‘tkazish oldidan katta masʼuliyatni his qilish kerak. Men har doim konsert dasturini o‘zim ishlab chiqaman, keyin xoreograf, prodyuser va stilist dizayner bilan maslahatlashgan holda bir butun holatga keltiramiz.
Konsert bermasligimning asosiy sababi farzandlarim bilan bog‘liq. Oxirgi vaqtlarda ular bilan ko‘proq birga bo‘lishim kerakligini tushunyapman. Ammo oldindan hech narsa deyolmayman, nima bo‘lishini Alloh biladi, — deydi xonanda Rayhon.
Xonanda bu yilgi konsertida yangi qo‘shiqlar bilan bir qatorda eski hit taronalar bo‘lishini ham maʼlum qildi. Ammo duetdoshlarining kimligini oshkor qilgani yo‘q.
Xonandaning Hamdam Sobirov bilan kuylagan “Qizim ko‘ylagim” qo‘shig‘i juda qisqa vaqtda 45 mln marta ko‘rildi. Buni rekord natija deyish mumkin. Rayhon G‘aniyeva qo‘shiqning hit bo‘lishini oldindan bilgan hamkasbining taklifini jon deb qabul qilgani haqida gapirdi.
— To‘g‘risini aytsam, bu qo‘shiq bunchalik hit bo‘lishini kutmagandim. Menimcha, Hamdam qo‘shiqning bunchalik mashhurlikka erishini avvaldan his qilgan. Chunki u bugungi kunning “hitmeyker” xonandalaridan biri. Taklif berganda xursand bo‘lib “Jonim bilan ijro etaman”, dedim. Qo‘shiqni ilk marta eshitganimda qalbimdan chuqur o‘rin oldi. Ammo qo‘shiq qisqa fursatda yaratilgani yo‘q. Taklif berganidan keyin yarim yil qo‘shiq ustida ishladi. Qo‘shiqning so‘zi, musiqasi ham Hamdam Sobirovning o‘ziga tegishli. “Nega bunaqa ko‘p vaqt sarfladingiz?” desam, sheʼrining so‘zlarini bir necha marta o‘zgartirganini aytdi. Hit qo‘shiqning yaratilishi oson kechmaydi, — deydi xonanda Rayhon.
Xonanda “So‘nggi konsertingizda tomoshabinlar qatorida kimlar bo‘lishini orzu qilardingiz” degan savolga ko‘ziga yosh olib, quyidagicha javob berdi.
— Ota-onamning bo‘lishini istayman. Qaniydi, shunday bo‘lganida, — deydi xonanda.
Xonanda konsert bilan bog‘liq maʼlumotlarni oshkor etishni istamadi. Ammo ishonch bilan bu yilgi konsert haqiqiy shou bo‘lishini aytib o‘tdi.
Konsert oldi tayyorlangan reportajni to‘liq tomosha qiling.
Izoh (0)