“Rayhondan pul yig‘ishni o‘rgandim”. Rayhonning turmush o‘rtog‘i Farhod Alimov uning ko‘pchilikka noma’lum qirralari haqida gapirdi

O‘zbekistonda xizmat ko‘rsatgan artist Rayhon G‘aniyeva turmush o‘rtog‘i Farhod Alimov bilan birghalikda “Milliy” teleakanlining “Ikkimiz” ko‘rsatuvida mehmon bo‘ldi. Ko‘rsatuv davomida Farhod Alimov rafiqasining muxlislar bilmaydigan jihatlari haqida so‘zlab berdi. 

— Ko‘pincha bolalarni o‘qishga jo‘natib, ko‘chada nonushta qilishga boramiz. Endi tanishgan yoshlarga o‘xshab qahva ichib o‘tiramiz. Asosan suhbatimiz ish haqida bo‘ladi. Qanday mavzuda qo‘shiq kuylashini maslahatlashamiz. Rayhon hech qachon mendan qachon kelishimni so‘ramaydi.

Kechki ovqatni birga tanovul qilib, suhbatlashib o‘tirishni biz ham xohlaymiz. Lekin kechasi ishlaganimiz uchun bunday holat kamdan kam bo‘ladi. Rayhonning vaqti bo‘lganida men to‘y xizmatida bo‘laman, yoki men uyda bo‘lsam, Rayhonda to‘rtta to‘y chiqib qoladi.
Rayhonni yarim kunda ham sog‘inib qolishim mumkin. Chunki uningdek inson bu dunyoda yo‘q. Kim nima desa desin, lekin erkak kishining eng yaqin do‘sti uning rafiqasi bo‘ladi.

“Rayhon endi biznes ham qilmoqchi”

— Turmush qurishdan avval Rayhon har yili konsert berishga harakat qilardi. Lekin har yili konsert berish uchun dasturning 70-80 foizi yangi qo‘shiqlardan iborat bo‘lishi kerak. Bu esa katta mehnat. Keyinchalik konsertlar oralig‘ini 2-3 yilga tushirdik. Rayhon o‘z ishini yaxshi ko‘radi, lekin bundan buyon boshqa ish ham qilmoqchi.

“Rayhondan pul yig‘ishni o‘rgandim”

—Rayhon menga pul yig‘ishni o‘rgatdi. U o‘zi qo‘shiqchi emas, business woman bo‘lishi kerak. U mening biznes kouchim hozirgi kunda. Unga uylangunimcha yaxshi pul ishlab, yaxshi mashina olish, sayohat qilishga qiziqardim. Hozir esa mashinamni yangilagandan ko‘ra, yana bitta uy olib qo‘ysam, bir kunimga yaraydi, deb o‘ylaydigan bo‘lib qolganman.

“Rayhon hammaga yaxshi gapiradi”

— Men juda qattiqqo‘lman. Rayhon esa hech kimni urishmaydi, bolalarga ham juda yaxshi gapiradi. “Ovqat yegisi kelmasa, yemasin”, deydi. Men esa bitta shapaloq tushirib, ovqatni yedirishga harakat qilaman. Chunki bizni ham shunday tarbiyalashgan. Bolalarni juda erkalatib yuborish kerak emas.