Ўзбекистонда хизмат кўрсатган артист Райҳон Ғаниева ҳар йили шоу-концерт бериб, мухлисларини хушнуд этарди. Афсуски, бу йил сўнгги концерти эканлигини айтгач, “Ҳумо Арена” муз саройида бўлиши режалаштирилган концерт дастури қолдирилгандан кейин мухлисларда кўплаб саволлар пайдо бўлди. Концерт олди хонанда бир гуруҳ журналистлар қатори “Дарё” мухбирларини ҳам тайёргарлик жараёнларини кўришга таклиф этди. Концерт баҳонасида кўплаб саволларга жавоб берди.
— Концерт бермайман, деганим ижоддан кетдим, дегани эмас. Ҳали кўп қўшиқлар айтаман, клиплар олишни ҳам режалаштириб қўйганман. Концерт катта куч ва меҳнат талаб қилади. Бундан ташқари, уни ўтказиш олдидан катта масъулиятни ҳис қилиш керак. Мен ҳар доим концерт дастурини ўзим ишлаб чиқаман, кейин хореограф, продюсер ва стилист дизайнер билан маслаҳатлашган ҳолда бир бутун ҳолатга келтирамиз.
Концерт бермаслигимнинг асосий сабаби фарзандларим билан боғлиқ. Охирги вақтларда улар билан кўпроқ бирга бўлишим кераклигини тушуняпман. Аммо олдиндан ҳеч нарса деёлмайман, нима бўлишини Аллоҳ билади, — дейди хонанда Райҳон.
Хонанда бу йилги концертида янги қўшиқлар билан бир қаторда эски ҳит тароналар бўлишини ҳам маълум қилди. Аммо дуэтдошларининг кимлигини ошкор қилгани йўқ.
Хонанданинг Ҳамдам Собиров билан куйлаган “Қизим кўйлагим” қўшиғи жуда қисқа вақтда 45 млн марта кўрилди. Буни рекорд натижа дейиш мумкин. Райҳон Ғаниева қўшиқнинг ҳит бўлишини олдиндан билган ҳамкасбининг таклифини жон деб қабул қилгани ҳақида гапирди.
— Тўғрисини айтсам, бу қўшиқ бунчалик ҳит бўлишини кутмагандим. Менимча, Ҳамдам қўшиқнинг бунчалик машҳурликка эришини аввалдан ҳис қилган. Чунки у бугунги куннинг “ҳитмейкер” хонандаларидан бири. Таклиф берганда хурсанд бўлиб “Жоним билан ижро этаман”, дедим. Қўшиқни илк марта эшитганимда қалбимдан чуқур ўрин олди. Аммо қўшиқ қисқа фурсатда яратилгани йўқ. Таклиф берганидан кейин ярим йил қўшиқ устида ишлади. Қўшиқнинг сўзи, мусиқаси ҳам Ҳамдам Собировнинг ўзига тегишли. “Нега бунақа кўп вақт сарфладингиз?” десам, шеърининг сўзларини бир неча марта ўзгартирганини айтди. Ҳит қўшиқнинг яратилиши осон кечмайди, — дейди хонанда Райҳон.
Хонанда “Сўнгги концертингизда томошабинлар қаторида кимлар бўлишини орзу қилардингиз” деган саволга кўзига ёш олиб, қуйидагича жавоб берди.
— Ота-онамнинг бўлишини истайман. Қанийди, шундай бўлганида, — дейди хонанда.
Хонанда концерт билан боғлиқ маълумотларни ошкор этишни истамади. Аммо ишонч билан бу йилги концерт ҳақиқий шоу бўлишини айтиб ўтди.
Концерт олди тайёрланган репортажни тўлиқ томоша қилинг.
Изоҳ (0)