O‘zbekistonda xizmat ko‘rsatgan artist Rayhon G‘aniyeva jurnalist Nazira Inoyatovaga bergan intervyusida bolalari uchun jiddiy qarorlar qabul qilgani, tund o‘tgan bolaligi va mablag‘ sabab ushalmayotgan orzulari haqida gapirdi.
— Bolaligim bilan bog‘liq xotiralarni eslash juda og‘ir. Sababi kunlarimning juda ko‘p qismi yolg‘izlikda o‘tgan. Onam mashhur aktrisa bo‘lgani uchun ishi juda ko‘p edi. Bog‘chada ham maxsus guruhga borganman. U yerda bolalar uxlab qolardi. Sanʼat internat-maktabida o‘qiganimda ham oilamdan yiroqda edim. Yolg‘izlik inson ruhiyatiga juda og‘ir taʼsir etarkan. Haligacha bolalik bilan bog‘liq voqealarni eslab, xuddi bo‘g‘zimga bir narsa tiqilib turgandek bo‘ladi. Onam hayotligida bu haqda gapirishni istamasdim. Uni ham, o‘zimni ham qiynagim kelmagan. U vaziyatda onamga ham oson emasdi. Sog‘lig‘ini tiklash uchun qo‘limdan kelgan barcha ishni qilganman.
Bu yil oxirgi konsert berishimni, bundan keyin “Rayhon shou”lar o‘tkazilmasligini aytdim. Bu qaror haqida bir necha yildan buyon o‘ylayman. O‘g‘illarim ham 10 yoshga yaqinlashib qolishdi. Ular ayni o‘qiydigan, nimalarnidir o‘rganadigan va bolaligi bilan bog‘liq xotiralarni yodida saqlaydigan yoshda. Shu bois ular bilan ko‘proq vaqt o‘tkazishga harakat qilaman. Agar zarur ishim bo‘lmasa, ko‘chaga chiqmayman. Tabiatan “oddiy beka” rolidagi ayolman. Bitta shou dasturiga esa kamida 5-6 oy tinimsiz tayyorgarlik ko‘raman. Turgan gapki, bu vaqtda oilaga, xususan, farzandlarimga yetarlicha eʼtibor berolmayman. Bolalarim bilan ko‘proq birga bo‘lish uchun ham so‘nggi shouni berishga qaror qildim. Bolalarim mendek yolg‘izlikni his qilishlarini istamayman, — deydi xonanda Rayhon.
Xonanda shuncha yil davomida nega o‘zbek tilini mukammal o‘rganolmagani va oilasida qaysi tilda gaplashishlariga ham oydinlik kiritib o‘tdi.
— Men bog‘cha, maktab hatto institutda ham rus guruhlarida tahsil olganman. Atrofimdagi insonlarning bari shu tilda muloqot qilishardi. Rus tilida fikrlayman va uni miyamda tarjima qilib gapirsam, xuddi to‘g‘ri tushuntirolmayotgandek bo‘laman. Singlim esa bolalikdan o‘zbek tilini yaxshi o‘zlashtirgan. Hatto shunday vaziyatlar ham bo‘lardiki, singlim o‘zbek tilini yaxshi bilgani uchun men bilishim kerak bo‘lmagan gaplarni onam bilan o‘zbek tilida gaplashardi (kulib). Singlim o‘zbekcha fikrlaydi va u mendan farqli xayolan gaplarini rus tiliga tarjima qilib gapiradi.
Turmush o‘rtog‘im Farhod aka ham rus tilida o‘qigani bilan o‘zbek tilida erkin muloqot qiloladi. Ammo oilada rus tilida gaplashamiz, — deydi xonanda Rayhon.
Xonanda yetim bolalar uchun maktabgacha taʼlim muassasasi, undan keyin klinika ochishni niyat qilgani, ammo uni amalga oshirolmagani haqida gapirdi.
— Haqiqatan ham ehtiyojmand insonlarga ham xizmat ko‘rsatadigan bog‘cha va klinika ochishni niyat qilardim. Ammo o‘rganib chiqsam, ikkisini ochishga ham juda katta mablag‘ sarflanar ekan. O‘zi ikki bolamga juda ko‘p mablag‘ sarflayman, biznes haqida o‘ylashga ham qo‘rqib qoldim. Katta emas-u, kichik bizneslarni yo‘lga qo‘ygandim. Ammo bu borada tajriba va bilimsizligim pand berdi. Shu bois hozir tadbirkorlik borasidagi kitoblarni ko‘p o‘qiyapman. Balki keyinchalik orzularimdan birini amalga oshirarman, — deydi xonanda Rayhon G‘aniyeva.
Izoh (0)