Rayhon G‘aniyeva qiz farzand ko‘rish orzusi, qovurg‘asini oldirgani haqidagi mish-mishlar va muvaffaqiyatsiz bizneslari haqida

O‘zbekistonda xizmat ko‘rsatgan artist Rayhon G‘aniyeva “Shok.uz” YouTube kanaliga bergan intervyusida muxlislarini qiziqtirgan ko‘plab savollarga javob berdi. Quyida xonandaning ayrim savollarga javoblari keltiriladi. 

— Intervyularingizdan birida qiz farzand ko‘rishni orzu qilishingiz haqida gapirgansiz. Jarayon qanday ketmoqda?

— Bugun ham turmush o‘rtog‘imga chaqaloq xohlashim haqida gapirdim. Ular esa farzand ko‘rish yoshidan o‘tganimizni aytdilar, — deydi xonanda.

— Boshqa farzand ko‘rishni rejalashtirmayapmiz. Menda uch nafar, Rayhonda esa ikkita umumiy besh farzandimiz bor. Men farzand tarbiyalashni juda murakkab va qiyin jarayon deb bilaman. Shu besh farzandimizni katta qilib olsak ham katta gap. Yozda Islom va Imron lagerga borishdi. Islomni o‘sha yerda bir bola xafa qilib qo‘yibdi. Men o‘g‘limga bu haqda aytdim va u lager ichkarisiga kirib, o‘sha bola bilan gaplashib chiqdi. Umuman olganda farzandlarimiz bir-biri bilan ahil va inoq”, — deydi Rayhonning turmush o‘rtog‘i Farhod Alimov.

— Sizni xipchabel bo‘lish uchun qovurg‘asini oldirib tashlagan deyishadi. Bu qanchalik to‘g‘ri?

—Xipchabel bo‘lish uchun qovurg‘asini oldirib tashlash mumkinligi haqida hozir sizdan eshityapman. Shunaqa qilsa bo‘larmikan? Qovurg‘a olinganidan so‘ng inson qanday yashaydi? Men hech qachon bunday qilmaganman. Onam rahmatli xuddi shunaqa xipchabel va sarvqomat edilar. Men ularga tortganman.

— Nima uchun shou-biznesda dugonangiz yo‘q?

— Shou-biznesda dugonam bor. U — taniqli xonanda Sogdiana. O‘zbek shou-biznesi vakillarining hammasi bilan yaxshi munosabatdaman, lekin yaqin emasman. Faqat ikki hamkasbim bilan gaplashmayman, xolos. Tanishlarim kechki ovqatlarga taklif qilishadi, lekin bormayman. Bo‘sh vaqtimni farzandlarim bilan o‘tkazishni xohlayman.

— Ferma biznesi bilan shug‘ullanayotganingiz haqida muxlislaringizga so‘zlab bergandingiz. Biznes qanday ketyapti?

—  Ferma ochib, o‘rdak boqishni yo‘lga qo‘ygandik. Biznesimiz o‘xshamadi. Qiyin ish ekan. Tadbirkorlar faqat 2 kilo va undan og‘ir o‘rdaklarni xarid qilarkan. Biz esa o‘rdakka faqat tabiiy narsa berib boqdik. Tabiiy yegulik yegan o‘rdaklar esa 2 kilo vazn to‘plashi qiyin bo‘larkan. To‘plagan payti esa juda qarib ketibdi, deyishdi. Bu biznesni aslida bir do‘stimiz taklif qilgandi. Qilaylik, zo‘r bo‘ladi, degandi. Lekin bo‘lmadi. Keyin daraxt ham ekib ko‘rdik. U ham o‘xshamadi. Shuni angladimki, mendan biznesmen chiqmas ekan.