Erkin Bozorovning tanilganiga ko‘p vaqt bo‘lgani yo‘q. Uni kino va seriallardagi rollari emas, balki saviyali roliklari xalq orasida mashhurlikka sabab bo‘ldi. O‘zi haqida gapirishni istamaydigan, shaxsiyatini hamisha ommadan sir tutadigan aktyor qanday qilib muvaffaqiyatga erishdi? Keling, ana shu savolga javob izlaymiz.
Erkin Bozorov — sanʼatdan butunlay yiroq bo‘lgan oilada dunyoga kelgan. U oilada yagona o‘g‘il farzand, uning ikki singlisi bor. Aktyor bolaligi bilan bog‘liq voqealarni quyidagicha eslaydi.
— Oilamizda sanʼatkorlar bo‘lmagan, ammo bobom rahmatli musiqaga juda qiziqqan va Toshkentga kelib sanʼat institutida bor-yo‘g‘i 6 oy tahsil olgan ekan. Bobomning aytishicha, u otasini ko‘rmagan, Abdulla Qodiriylar qatl etilgan vaqtida uning otasi ham xalq dushmani deb topilgan ekan. Oilada yagona boquvchi bo‘lgani uchun o‘qishni tashlab, Navoiyga ketib ishlashga majbur bo‘lgan. Bobom Shirin Azizova va Baxtiyor Ixtiyorov kabi mashhur aktyorlar bilan kursdosh bo‘lgani haqida gapirib berardi. Bobom qishloqqa qaytib 40 yil kolxozda haydovchilik qilgan, ota-onam esa sanʼatdan butunlay yiroq insonlar.
Bolaligim asosan bobom bilan o‘tgan. Chunki onam ko‘p kasal bo‘lgani uchun tinimsiz kasalxonada davolanardi. Dadam esa doim ishda bo‘lardi, — deydi aktyor.
Erkin Bozorov avvaliga aktyor bo‘lishni orzu qilmagani, 16 yoshida uyidan uchirma bo‘lgani haqida so‘zlab berdi.
— Adabiyotga qiziqardim, ammo aktyor bo‘laman, degan qatʼiy qaror bo‘lmagan. Maktabni tamomlab, huquqshunoslik kollejiga o‘qishga kirganman. O‘qish sabab, 16 yoshimdan buyon ota-onamdan alohida yashayman. O‘qishlarim hamisha aʼlo bo‘lgan, tartibli o‘quvchi bo‘lganman. Kollejni tamomlab, 2007-yili Toshkentga kelganman. Avvaliga hujjatlarimni O‘zbekiston davlat sanʼat va madaniyat institutiga topshirganman. Ammo ota-onam norozi bo‘lgani uchun bu institutda o‘qimaganman. U paytlari oliy taʼlimdan korrupsiya avj olgan paytlar edi. Yuridik, o‘zbek filologiyasi, jurnalistika kabi fakultetlarga ketma-ket hujjat topshirganman. Ammo talaba bo‘lish nasib etmagan. Shunda kimdir bali pastroq fakultetga o‘qishga topshirishni maslahat bergan. Qiziqmasam ham fizika yo‘nalishiga hujjat topshirganman. Unda ham omadim kulmagan. Beshinchi urinishda sanʼat institutiga imtihon topshirganman va shartnoma asosida o‘qishga qabul qilinganman, — deydi aktyor.
Erkin Bozorov ota-onasidan yashirib, sanʼat institutiga hujjat topshirgani haqida so‘zlab berdi.
— Hech kimga aytmay sanʼat institutiga hujjat topshirganman. Shartnoma asosida o‘qishga qabul qilinganman. Dadam sanʼatkor bo‘lishimga qarshi bo‘lgani uchun “Jurnalistikaga o‘qishga kirdim”, deb qo‘yganman. Mandat chiqqan kuni uyimizga qarindoshlar to‘plandi. Shunda bobom rahmatli supada o‘tirib “Erkin bugun institutga kirdi, u artist bo‘ladi”, degan. Ota-onam hayron bo‘lib menga qarashgan “Bu ham institut, kirganiga shukur qillaring”, deganidan keyin indashmagan, — deydi aktyor Erkin Bozorov.
Aktyor kinodagi ilk roli haqida so‘zlab berdi.
— 2014-yili Shuhrat Abbosov “Dilor, dilor, dil va or” nomli filmni suratga oladigan bo‘ldi. Undan avval uning kursida o‘qiydigan bolalarning kurs ishida yordamchi aktyor bo‘lib rol ijro etgandim. Ustoz shunda ko‘rib, eslab qolgan ekan. “Abbosov kino olyapti” deb institutda gap tarqagan payti meni hovlida ko‘rib “Senga rol bor, falon kuni kastingga kelgin”, degan. Shu orqali ilk rolim yaralgan, — deydi aktyor.
Erkin Bozorov juda ko‘p film va seriallarda rol ijro etgan. Ammo ularning hech biri uni aktyor sifatida tanilishiga yordam bermagan. Hatto, “Said va Saida” filmida asosiy rolni ijro etgan bo‘lsa-da, tomoshabin nazariga tushmagan.
— Haqiqatan ham shunday. “Rolni yaxshi ijro etibsiz”, deyishardi, ammo ko‘cha-ko‘yda ketayotganda yaqqol tanishmasdi. Bir kuni reklama roligiga suratga tushishga taklif bo‘ldi. 100 AQSH dollari gonorar berishganida rosa xursand bo‘lgandim. Chunki u paytlari Toshkentda ijara uyda yashardim, syomkalarga kamdan-kam chaqirishardi. O‘sha kuni pulni so‘mga aylantirib, rosa xursand bo‘lganman. Ammo ertasi kuni bozorga chiqib ro‘zg‘orlikka ul-bul narsa oldim-u, dushanba kuni aytarli pul qolmaganini sezdim. O‘shanda shoirning gonorar haqi haqida monolog yozgandim. Videoni suratga olib ijtimoiy tarmoqqa qo‘ysam kutilmaganda mashhurlikka erishdi. Aslida shoir qiyofasida o‘z dardlarimni bayon qilgandim. Undan keyin GMdagi muammo haqidagi monolog ham tarqalib ketdi. Keyin o‘zimga bir teatr aktyori yo‘nalishida ijod qilish maʼqul keldi. Chunki unda men o‘z-o‘zimga rahbar bo‘ldim, — deydi aktyor Erkin Bozorov.
Aktyor ijrosidagi dangalchi va adolatparvar bobo qiyofasi ham tomoshgabinlarga maʼqul kelgan. Erkin Bozorov bu obrazni yaratishda bobosining motividan foydalangani haqida so‘zlab berdi.
— Bobom rahmatli xuddi shunday inson edi. Gapni shart gapirar va hech qachon o‘ziga yoqmaydigan ishni qilmasdi. Gapirish ohangi ham xuddi shunday edi. Obraz tanlayotganda shu qiyofani motiv qilib olishga qaror qilganman, — deydi aktyor.
Aktyor oilali va yaqin kunlarda ota-onasini ham Toshkentga kelishlarini niyat qilmoqda.
— 28 yoshimda o‘zim tanlagan qizga uylanganman. Onam “O‘zingga maʼqul kelganiga uylan, yashaydigan sen”, degan. Ayolim bilan shunchaki tanishib qolganmiz, taqdir ekan oila qurdik. Hozirda ikki nafar o‘g‘limiz bor. Nurafshon shahrida ko‘p qavatli uyda turamiz. Hamisha ota-onam bilan birga yashashni orzu qilaman. 16 yoshimdan buyon alohida yashaganim uchunmi ularning mehriga hamisha chanqoqman. Nasib qilsa, tez orada sharoit qilib ular bilan katta oila bo‘lib yashash niyatim bor, — deydi aktyor Erkin Bozorov.
Izoh (0)