Garvard universiteti prezidenti Klodin Gey antisemitizm va o‘zining doktorlik dissertatsiyasida plagiat aniqlangani sababli iste’foga chiqdi, deya xabar bermoqda Associated Press. Garvard prorektori Alan Garber muvaqqat prezident vazifasini bajaradi.
Agentlikning ta’kidlashicha, “konservativ faollar” Gey xonimni Kongressdagi tinglovdan so‘ng antisemitizmda ayblay boshlagan, unda u universitetdagi yahudiylarni genotsidga chaqirish Garvard siyosatini buzishi haqida aniq qilib gapirmagan.
Antisemitizm ayblovlari jamoatchilik e’tiborini universitet prezidentining 1997-yilda chop etilgan doktorlik dissertatsiyasiga qaratdi: Gey xonim tanqidchilarining fikricha, unda plagiat bor.
Keyinchalik Garvard boshqaruv kengashi dissertatsiyada “bir qancha noto‘g‘ri iqtibos holatlari” aniqlanganini, ammo jiddiy qonunbuzarliklar topilmaganini bildirdi.
Bir necha kundan so‘ng, boshqaruv kengashi dissertatsiyada “muallifsiz keltirilgan o‘xshash jumlalar”ning yana ikkita misolini topgani haqida xabar berdi. Kengash Gey xonim dissertatsiyasini yangilashini ma’lum qildi.
Klodin Gey Garvard universiteti tarixidagi birinchi afroamerikalik prezident edi. U ushbu lavozimni 2023-yil iyul oyida egallagan. Gey xonim siyosatshunos va iqtisodchi. Stenford universitetida iqtisod, Garvardda siyosatshunoslik va hukumat nazariyasi bo‘yicha tahsil olgan.
Izoh (0)