Гарвард университети президенти Клодин Гей антисемитизм ва ўзининг докторлик диссертациясида плагиат аниқлангани сабабли истеъфога чиқди, дея хабар бермоқда Associated Press. Гарвард проректори Алан Гарбер муваққат президент вазифасини бажаради.
Агентликнинг таъкидлашича, “консерватив фаоллар” Гей хонимни Конгрессдаги тингловдан сўнг антисемитизмда айблай бошлаган, унда у университетдаги яҳудийларни геноцидга чақириш Гарвард сиёсатини бузиши ҳақида аниқ қилиб гапирмаган.
Антисемитизм айбловлари жамоатчилик эътиборини университет президентининг 1997 йилда чоп этилган докторлик диссертациясига қаратди: Гей хоним танқидчиларининг фикрича, унда плагиат бор.
Кейинчалик Гарвард бошқарув кенгаши диссертацияда “бир қанча нотўғри иқтибос ҳолатлари” аниқланганини, аммо жиддий қонунбузарликлар топилмаганини билдирди.
Бир неча кундан сўнг, бошқарув кенгаши диссертацияда “муаллифсиз келтирилган ўхшаш жумлалар”нинг яна иккита мисолини топгани ҳақида хабар берди. Кенгаш Гей хоним диссертациясини янгилашини маълум қилди.
Клодин Гей Гарвард университети тарихидаги биринчи афроамерикалик президент эди. У ушбу лавозимни 2023 йил июль ойида эгаллаган. Гей хоним сиёсатшунос ва иқтисодчи. Стенфорд университетида иқтисод, Гарвардда сиёсатшунослик ва ҳукумат назарияси бўйича таҳсил олган.
Изоҳ (0)