AQSH Moliya vazirligining statistik ma’lumotlariga ko‘ra, AQSHning davlat qarzi hajmi birinchi marta 34 trillion dollardan oshdi.
Statistika 1993-yildan boshlangan ma’lumotlarni hisobga oladi. 29-dekabr holatiga (so‘nggi ma’lumotlarga) ko‘ra, mamlakatning jami to‘lanmagan davlat qarzi 34 trillion 1 milliard 493 million AQSH dollarini tashkil qildi. Bir kun avval u 33,91 trillion dollarga baholangan edi.
Davlat qarzining avvalgi rekord darajasi 2023-yil sentabr oyi o‘rtalarida qayd etilgan — 33 trillion dollar.
Ma’lumot uchun, AQSH davlat qarzi — federal hukumatning kreditorlar oldidagi qarzi miqdoridir: bular fuqarolar yoki xorijiy investorlar kabi xususiy shaxslar, shuningdek, shtatlar yoki yirik fondlar bo‘lishi mumkin. Vashington 20 yildan ortiq davom etayotgan budjet taqchilligini qoplash uchun qarz oladi.
2023-yil boshida AQSH davlat qarzi belgilangan chegara — 31,4 trillion dollardan oshib ketdi. Shundan so‘ng, AQSH Moliya vazirligi limit ko‘tarilmasa, defolt yuz berishi xavfi haqida bir necha bor ogohlantirdi.
AQSH prezidenti Jo Bayden va demokratlar Kongressni hech qanday shartlarsiz limitni oshirishga chaqirdi. Shu bilan birga, Vakillar palatasini nazorat qiluvchi respublikachilar budjet xarajatlarini kamaytirmasdan turib, qarz limitini oshirilishini ma’qullamadi. 29-may kuni Bayden va palataning o‘sha paytdagi spikeri Kevin Makkarti nihoyat murosaga erishdi.
Izoh (0)