Mashhur Garvard universiteti prezidenti Klodin Gey ilmiy ishlarining ba’zi qismlarini ko‘chirgani aniqlandi. Washington Post gazetasi Geyning ishlarida “son-sanoqsiz plagiat” topilganini xabar berdi.
“Talabalar plagiat uchun universitetdan haydalishi mumkin, lekin universitet prezidenti avvalgidek ishlashda davom etishi mumkin emas”, — deb yozadi Kolumbiya universiteti tilshunoslik professori Jon Makvorter.
Gey hamon o‘z lavozimida qolmoqda va hatto AQSH sobiq prezidenti, universitetning sobiq talabasi Barak Obama tomonidan qo‘llab-quvvatlanmoqda.
Yaqinda Garvard prezidenti HAMASning Isroilga qilgan hujumini qoralamagani va kampusdagi antisemitizm tartibsizliklarini faqat “diskriminatsiya” deb atagani uchun tanqid qilingandi. Endi bunga plagiat mojarosi qo‘shildi.
Washington Post sharhlovchisi Rut Markusning ta’kidlashicha, Gey butun paragraflarni boshqa olimlarning asarlaridan ko‘chirgan.
“Siyosatshunos Klodin Geyning ilmiy ishlaridagi muammoli iqtiboslar inkor etilmaydigan darajada ko‘p bo‘ldi. Ba’zilari bir xil konstruksiyadan foydalanish ramkasidan chiqqan”, — dedi u.
O‘z navbatida, New York Times’ning ta’kidlashicha, Geyning faoliyati “progressiv universitet qora tanli ayollar haqida gap ketganda ikki tomonlama standartga ega degan taassurot uyg‘otadi”.
Izoh (0)