Qozog‘istonda qizamiq bir yoshgacha bo‘lgan ikki bolaning o‘limiga sabab bo‘ldi. Bu haqda sog‘liqni saqlash vaziri o‘rinbosari – Respublika bosh davlat sanitariya vrachi Ayjan Esmagambetova jurnalistlarga ma’lum qildi.
“Ikkita o‘lim holati qayd etilgan — Ostona va Sharqiy Qozog‘iston viloyatida. Bular bir yoshgacha bo‘lgan bolalar, ya’ni emlash yoshiga yetmagan bolalardir. Ulardan biri muddatidan oldin tug‘ilgan, ko‘plab patologiyalari bo‘lgan, keyin unga qizamiq qo‘shilgan”, — dedi u.
Esmagambetova mamlakatda qizamiq bilan kasallanish ko‘payib borayotgani haqida gapirar ekan, har qanday yuqumli kasallik o‘zining siklik xususiyati bilan ajralib turishini tushuntirdi.
“Qizamiqniki taxminan 5-7 yilni tashkil etadi. Kasallikning oxirgi avj olishi 2019-yilda qayd etilgan va aholini ommaviy emlash ham amalga oshirilgan. Hozir kasallanganlarning 65 foizini besh yoshgacha bo‘lgan bolalar tashkil etadi. Shu sababli qo‘shimcha ommaviy emlash uchun shu yosh toifasi tanlandi”, — dedi bosh sanitariya shifokori.
27-dekabr holatiga ko‘ra, Qozog‘istonning turli viloyatlarida 15 nafar bolaning ahvoli og‘ir.
Izoh (0)