Қозоғистонда қизамиқ бир ёшгача бўлган икки боланинг ўлимига сабаб бўлди. Бу ҳақда соғлиқни сақлаш вазири ўринбосари – Республика бош давлат санитария врачи Айжан Эсмагамбетова журналистларга маълум қилди.
“Иккита ўлим ҳолати қайд этилган — Остона ва Шарқий Қозоғистон вилоятида. Булар бир ёшгача бўлган болалар, яъни эмлаш ёшига етмаган болалардир. Улардан бири муддатидан олдин туғилган, кўплаб патологиялари бўлган, кейин унга қизамиқ қўшилган”, — деди у.
Эсмагамбетова мамлакатда қизамиқ билан касалланиш кўпайиб бораётгани ҳақида гапирар экан, ҳар қандай юқумли касаллик ўзининг циклик хусусияти билан ажралиб туришини тушунтирди.
“Қизамиқники тахминан 5-7 йилни ташкил этади. Касалликнинг охирги авж олиши 2019 йилда қайд этилган ва аҳолини оммавий эмлаш ҳам амалга оширилган. Ҳозир касалланганларнинг 65 фоизини беш ёшгача бўлган болалар ташкил этади. Шу сабабли қўшимча оммавий эмлаш учун шу ёш тоифаси танланди”, — деди бош санитария шифокори.
27 декабрь ҳолатига кўра, Қозоғистоннинг турли вилоятларида 15 нафар боланинг аҳволи оғир.
Изоҳ (0)