Toshkent viloyati hokimligi Xalq deputatlari Chirchiq shahar Kengashi deputatining iddaoli chiqishiga javob qaytarib, deputatga sessiya davomida so‘z berilmaganini texnik xatolik deya baholadi.
Deputat Jahongir To‘laganov o‘zining Telegram kanalida chiqish qilib, Xalq deputatlari viloyat Kengashi sessiyasida so‘z ololmaganini aytib, viloyat rahbari Zoir Mirzayevga murojaat yo‘llagan edi.
Bugun Nurafshon shahrida Xalq deputatlari Toshkent viloyati Kengashining navbatdagi 86-sessiyasi o‘tkazildi. Jahongir To‘laganov sessiyada o‘ziga so‘z berilmagani haqida bildirgan.
Sessiyaga joylardagi mahalliy Kengashlar deputatlari ham taklif etildi. Sessiyada jami 3 nafar ma’ruzachi qatnashdi, 7 nafar deputat savol berdi, muhokamada qatnashdi. Xususan, hududiy kengashlardan Qibray tumani Kengashi deputati Olim Sulaymonov savol va takliflari bilan muhokamada ishtirok etdi.Chirchiqdagi studiyadan qatnashgan Jahongir To‘laganovga viloyat kengashi sessiyasida so‘z berilmagani bahsli holat bo‘lib, vaziyat o‘rganilganda texnik xatolik sabab ekani aniqlandi. Zoir Mirzayevning topshirig‘i bilan bu holat bo‘yicha mas’ul texnik xodim ogohlantirildi. Xalq deputatlari viloyat va shahar, tumanlar kengashlarining kengaytirilgan qo‘shma yig‘ilishi bo‘lgani sababli sessiyada so‘zga turli sabablar bilan chiqmagan deputat savol yoki takliflarni yozma ravishda bildirish huquqiga ega. Ularning har qanday taklif yoki mulohazalari tegishli tartibda o‘rganib chiqiladi va taklif asosli bo‘lsa, yig‘ilish qaroriga o‘zgartish kiritilishi mumkin, — deyiladi viloyat hokimligining rasmiy kanalida e’lon qilingan bayonotda.
Xalq deputatlari Toshkent viloyati kengashi kotibiyati mudiri Otabek Anorovning bildirishicha, Jahongir To‘laganov singari faol deputatlarning taklifini eshitmaslik noo‘rin hisoblanadi.
Biz sessiyada kimgadir so‘z bermaslik kabi xunuk holatlarga mutlaqo qarshimiz, bu vaziyatga ham bevosita viloyat sessiyada qatnashgan mas’ul sifatida qandaydir siyosiy tus berilishi qo‘pol xato, deb hisoblayman. Xalq deputatlari Chirchiq shahri kengashi deputati Jahongir To‘laganov bugun ijtimoiy tarmoq orqali bildirgan taklif va mulohazalari o‘rganib chiqiladi va bu bo‘yicha qo‘shimcha rasmiy munosabat beriladi, — deydi Otabek Anorov.
Izoh (0)