Toshkent viloyati hokimining 2 o‘rinbosari va tuman hokimiga xizmat mashinalari uchun 1,3 milliard so‘m ajratilgani xabar qilingandi. Viloyat hokimligi mazkur holatga tushuntirish berdi.
Xabarda aytilishicha, prezidentning 2022-yil 19-dekabrdagi “Elektromobillar ishlab chiqarishni tashkil etishni davlat tomonidan qo‘llab-quvvatlash chora-tadbirlari to‘g‘risida”gi PQ-443-sonli qarori 8-bandiga asosan, 2023-2025-yillarda davlat boshqaruvi va mahalliy davlat hokimiyati organlari, ustav kapitalida davlat ulushi 50 foiz va undan ortiq bo‘lgan korxonalar tomonidan xarid qilinadigan elektromobillar va gibrid avtomobillar bo‘yicha maqsadli ko‘rsatkichlar belgilangan bo‘lib, unda Toshkent viloyati hokimligi uchun 1 milliard 200 million so‘mga 3 dona xarid qilinishi qayd etilgan.
Shu bilan birga, mazkur qarorning 8-bandida davlat hokimiyati organlari tomonidan sotib olinadigan avtotransport vositasining eng yuqori narxi bo‘yicha o‘rnatilgan cheklovlarga elektromobillar va gibrid avtomobillarning bozor narxidan kelib chiqib tegishli o‘zgartirishlar kiritish mumkinligi belgilab qo‘yilgan. PQ-443-sonli qaror ijrosini ta’minlash borasida Toshkent viloyati hokimligiga Iqtisodiyot va moliya vazirligining ko‘rsatma xati ham yuborilgan.
Viloyat hokimining ikki o‘rinbosari va Yuqori Chirchiq tumani hokimining xizmat mashinalari o‘ta ta’mirtalab holatga kelgani, ta’mirlashga ko‘p mablag‘ sarflanishi, eskirgan avtomashinalar ko‘p yoqilg‘i sarf etganini inobatga olib hamda qaror ijrosini ta’minlash maqsadida, Toshkent viloyati hokimi tomonidan tegishli farmoyish imzolangan.
Izoh (0)