“Ikki mingga yaqin migrant yoshlar Vatanga qaytariladi va bandligi ta’minlanadi” — Zoir Aliqulov

Qarshi tumani hokimi Zoir Aliqulov 2024-yilda Qarshi tumanida yashagan va ayni kunda xorijda mehnat qilayotgan 1783 nafar migrant yoshlar Vatanga qaytarilishini va ularning bandligi ta’minlanishini ma’lum qildi.

Bu haqda “Daryo”ga xabar bergan hokimlik axborot xizmati rahbari To‘lqin Turdiyevning ma’lumot berishicha, hokim mazkur masalada yoshlar bilan uchrashuvida gapirgan. 

Qayd etilishicha, bugun Qarshi tumani hokimi Zoir Aliqulov boshchiligidagi sektor rahbarlari va tuman yoshlarining uchrashuvi bo‘lib o‘tgan. 

 

2024-yilda xorijda mehnat qilayotgan 1783 nafar yoshlarni Vatanga qaytarish va ularni shu yerda band qilish choralarini ko‘ramiz. Kelgusi uch yillikda tumanni yoshlar uchun ishsizlikdan holi hududga aylantirish yo‘lida barcha harakatlarni ishga solamiz, — dedi tuman hokimi yoshlar bilan muloqot qilar ekan. 

Hokimning yoshlarga bildirishicha, tumanda keyingi yilda asosiy e’tibor yoshlarning xorijiy tillarni o‘rganishi va axborot texnologiyalarini mukammal o‘zlashtirishiga qaratiladi. 

Har bir mahallada kamida ikki nafardan yosh dasturchilarni tayyorlash yo‘lga qo‘yiladi. “Xorijiy til bilan ITga yo‘l” loyihasi doirasida 180 nafar yoshning xorijiy tillarni o‘qish xarajatlari qoplab beriladi. Tumanimizda keyingi yilning birinchi yarim yilligida qad rostlaydigan “Yoshlar markazi”da juda katta IT markazi ish boshlaydi. Bundan tashqari davlat ko‘magiga muhtoj og‘ir toifadagi 25 nafar yoshning ijtimoiy-iqtisodiy masalalarini hal qilish orqali hayoti yaxshilanishiga ko‘mak beriladi. 1752 nafar ishsiz yosh va 2261 nafar maktab bitiruvchilarining bandligi ta’minlanadi.

Shu bilan birgalikda, xorijda mehnat qilayotgan 1783 nafar yoshlarni Vatanga qaytarish va shu yerda band qilish choralari ko‘riladi. Ijtimoiy ko‘makka muhtoj 1327 nafar yoshga “Yoshlar daftari” orqali yordam ko‘rsatiladi. Ayniqsa, ilm olishga va kitob o‘qigan yoshlarni muntazam ravishda moddiy-ma’naviy rag‘batlantirib borishga alohida e’tibor qaratiladi, — dedi tuman hokimi. 

Hokim va yoshlar muloqoti davomida sportchilar, faol yoshlar va ularning ota-onalarini taqdirlash marosimi ham bo‘lib o‘tgan.

Yoshlarning chet tillarni o‘rganishiga, ta’lim olishiga sharoit yaratib bergan ota-onalar kelajak uchun mustahkam poydevor qurmoqda. Ularni dunyoqarashi keng, o‘rnak sifatida ko‘rsatiladigan insonlar deb hisoblayman. Albatta, bunday ota-onalarni doimiy tarzda rag‘batlantirib borishga alohida e’tibor qaratamiz, — dedi Zoir Aliqulov.