Тошкент вилояти ҳокимлиги Халқ депутатлари Чирчиқ шаҳар Кенгаши депутатининг иддаоли чиқишига жавоб қайтариб, депутатга сессия давомида сўз берилмаганини техник хатолик дея баҳолади.
Депутат Жаҳонгир Тўлаганов ўзининг Telegram каналида чиқиш қилиб, Халқ депутатлари вилоят Кенгаши сессиясида сўз ололмаганини айтиб, вилоят раҳбари Зоир Мирзаевга мурожаат йўллаган эди.
Бугун Нурафшон шаҳрида Халқ депутатлари Тошкент вилояти Кенгашининг навбатдаги 86-сессияси ўтказилди. Жаҳонгир Тўлаганов сессияда ўзига сўз берилмагани ҳақида билдирган.
Сессияга жойлардаги маҳаллий Кенгашлар депутатлари ҳам таклиф этилди. Сессияда жами 3 нафар маърузачи қатнашди, 7 нафар депутат савол берди, муҳокамада қатнашди. Хусусан, ҳудудий кенгашлардан Қибрай тумани Кенгаши депутати Олим Сулаймонов савол ва таклифлари билан муҳокамада иштирок этди.Чирчиқдаги студиядан қатнашган Жаҳонгир Тўлагановга вилоят кенгаши сессиясида сўз берилмагани баҳсли ҳолат бўлиб, вазият ўрганилганда техник хатолик сабаб экани аниқланди. Зоир Мирзаевнинг топшириғи билан бу ҳолат бўйича масъул техник ходим огоҳлантирилди. Халқ депутатлари вилоят ва шаҳар, туманлар кенгашларининг кенгайтирилган қўшма йиғилиши бўлгани сабабли сессияда сўзга турли сабаблар билан чиқмаган депутат савол ёки таклифларни ёзма равишда билдириш ҳуқуқига эга. Уларнинг ҳар қандай таклиф ёки мулоҳазалари тегишли тартибда ўрганиб чиқилади ва таклиф асосли бўлса, йиғилиш қарорига ўзгартиш киритилиши мумкин, — дейилади вилоят ҳокимлигининг расмий каналида эълон қилинган баёнотда.
Халқ депутатлари Тошкент вилояти кенгаши котибияти мудири Отабек Аноровнинг билдиришича, Жаҳонгир Тўлаганов сингари фаол депутатларнинг таклифини эшитмаслик ноўрин ҳисобланади.
Биз сессияда кимгадир сўз бермаслик каби хунук ҳолатларга мутлақо қаршимиз, бу вазиятга ҳам бевосита вилоят сессияда қатнашган масъул сифатида қандайдир сиёсий тус берилиши қўпол хато, деб ҳисоблайман. Халқ депутатлари Чирчиқ шаҳри кенгаши депутати Жаҳонгир Тўлаганов бугун ижтимоий тармоқ орқали билдирган таклиф ва мулоҳазалари ўрганиб чиқилади ва бу бўйича қўшимча расмий муносабат берилади, — дейди Отабек Аноров.
Изоҳ (0)