G‘azo sektorida HAMAS va Isroil o‘rtasida urush boshlanganidan buyon 103 nafar jurnalist halok bo‘ldi, deb xabar bermoqda Al Jazeera anklav hukumatiga tayanib.
Shu bilan birga, Jurnalistlarni himoya qilish qo‘mitasining (CPJ) 23-dekabrdagi ma’lumotlariga ko‘ra, janglarda 69 nafar jurnalist va OAV xodimlari halok bo‘lgan, ulardan 62 nafari falastinlik, to‘rt nafari isroillik, qolgan uch nafari livanlik edi.
5-dekabr kuni qo‘mita 63 nafar jurnalistning o‘limi haqida xabar bergan.
16-dekabr kuni Al-Jazeera telekanali G‘azo sektoridagi maktab binosiga Isroil hujumi chog‘ida o‘z xodimi halok bo‘lgani haqida xabar berdi. Telekanal ma’lumotlariga ko‘ra, operator Samer Abudakiy va muxbir Vael Daduh reportaj tasvirga olayotgan vaqtda Isroil binoga dronlar otgan. Jurnalistlar jarohatlangan.
Telekanalning xabar berishicha, Isroil kuchlari tez yordam mashinalarining o‘tishiga yo‘l qo‘ymagani uchun qutqaruvchilar va shifokorlar Abudakiyning yoniga bora olmagan, oqibatda operator halok bo‘lgan. Yelkasidan yaralangan Daduh o‘zi kasalxonaga borgan.
Samer Abudakiyning o‘limidan so‘ng Al Jazeera G‘azo sektorida o‘ldirilgan jurnalistlar va OAV xodimlari soni 90 nafardan oshganini ma’lum qildi.
Izoh (0)