Daniya shimolida Bloxus va Rodxus qishloqlari yaqinidagi sohilda 24-dekabr, yakshanba kuni ertalab o‘n minglab juft poyabzal topildi.
“Shanba kuni qirg‘oq toza edi”, — deydi inspektor Tomas Durloo Daniya DR telekanaliga. Durloo bu manzarani aqlbovar qilmas deb ta’rifladi.
Nazoratchi 14 kilometrlik sohil chizig‘ida tartibni saqlashga mas’ul: topilmalar butun chiziq bo‘ylab sochilgan. Durloo poyabzaldan tashqari, tibbiy buyumlar va plastiklarni topdi.
“Qadoqlanmagan tovarlar Shimoliy dengizning sho‘r suvi tomonidan deyarli yarqosiz holga keltirilgan, ammo ularni o‘g‘irlashga urinayotgan odamlarga buning ahamiyati yo‘q”, — dedi Durloo.
Uning ta’kidlashicha, poyabzal va boshqa buyumlar dengizda yuk tashishga ixtisoslashgan Maersk kompaniyasiga tegishli deb ishonilmoqda.
22-dekabr, juma kuni kompaniyaning eng yirik konteyner kemalaridan biri Mayview Maersk Shimoliy dengizda bo‘ronga duch kelib, kemadagi kamida qirqta 40 futlik konteyner suvga qulab tushdi, deb yozadi The Maritime Executive. Kompaniya yuk kemasidagi odamlar va kemaning o‘zi jabrlanmaganini ma’lum qildi.
Yana bir sohil inspektori Andreas Rasmusen o‘zi nazorat qiladigan hududga to‘rtta konteyner chiqarib tashlanganini aytdi. Sohil bo‘ylab sochilgan tovarlar orasida muzlatgichlar, sovitgichlar va dori-darmonlar bor.
Maersk konteynerlarni qidirish va qirg‘oqqa chiqarib tashlangan narsalarni yig‘ish uchun mahalliy kompaniyani yollaganini ma’lum qildi.
Tomas Durloo ham, Andreas Rasmusen ham jurnalistlarga ilgari bunday hodisani sira ko‘rmaganini aytdi. Durlooning xizmatga kelganiga uch oy ham bo‘lmagan, biroq bungacha otasi 30 yil shu lavozimda ishlagan. 30 yil davomida Durloo ko‘rgan yagona yirik hodisa qirg‘oqqa chiqqarib tashlangan kit edi.
Izoh (0)