Isroilning 7-oktyabrdan beri G‘azo sektoriga bergan zarbalari oqibatida halok bo’lganlar soni 20 258 kishiga yetdi, 53 688 kishi jarohat oldi. Bu haqda G‘azo sog‘liqni saqlash vazirligiga tayanib, Al-Jazeera xabar berdi.
Ma’lum qilinishicha, so‘nggi 24 soat ichida Isroilning sektordagi hujumlari oqibatida 201 kishi halok bo‘lgan, 368 kishi jarohatlangan. Vayronalar ostida yana minglab jasadlar qolib ketgani taxmin qilinmoqda.
“Hududning shimoliy qismlarini bombardimon qilish va o‘qqa tutish davom etmoqda, chunki bu hududlarda bir necha kun davom etgan janglardan so‘ng chirigan jasadlar topilgan”, — deydi Al-Jazeera muxbiri.
Ta’kidlanishicha, 20 kun davomida vayronalar va ko‘chalarda qarovsiz qolgan jasadlar 23-dekabr kuni G‘azo fuqarolik mudofaasi guruhi tomonidan dafn etilgan.
Isroil va Falastin o‘rtasidagi uzoq muddatli mojaro shu yilning 7-oktyabrida avj oldi. Tomonlar shu kungacha zarbalar almashishda davom etmoqda. Noyabr oyida Qatar Isroil va HAMAS o‘rtasida to‘rt kunlik sulhga vositachilik qilgandi.
24-noyabr kuni ertalab o‘t ochish to'xtadi, shundan so‘ng sulh ikki marta uzaytirildi — avvaliga ikki kunga, keyin yana bir kunga. 1-dekabr kuni ertalab uning muddati tugadi va janglar yana davom etdi.
BMTning falastinlik qochqinlarga yordam ko‘rsatish agentligi (UNRWA) bosh komissari Filipp Ladzarini G‘azo yashash uchun yaroqsiz bo‘lib qolgani va u yerdagi vaziyat yomonlashayotganini aytgandi.
Izoh (0)