2023-yilning 24-dekabr kuni o‘zbek kino ixlosmandlariga “Muhtasham yuz yil”, “Sevgi iztirobi”,“Choliqushi” (2013-yil) seriallari, “Mening akam” filmi bilan tanilgan turk yulduzi Burak O‘zchivit 39 yoshni qarshi oldi. Quyida nafaqat Turkiya, balki dunyoning ko‘plab mamlakatlarida o‘z muxlislariga ega aktyorning hayot va ijod yo‘liga nazar tashlaymiz.
Bolalik yillari
Burak O‘zchivit 1984-yilda Turkiyaning Mersin shahrida dunyoga kelgan. Otasi Byulent O‘zchivit kichik restoran egasi, onasi Jeyhan esa Burak va uning opasi Burjun tarbiyasi bilan mashg‘ul bo‘lgan. Bolaligidan og‘ir-bosiq fe’l atvor egasi bo‘lgan Burakning eng sevimli mashg‘uloti soatlab multfilm tomosha qilish bo‘lgan. U superqahramonlarni juda ham yaxshi ko‘rgan va atrofdagilariga katta bo‘lsa, “Betmen” bo‘lishini ta’kidlagan. Keyinchalik do‘stlari bilan vaqt o‘tkazish, xususan, futbol o‘ynash va sport zalda shug‘ullanishni kanda qilmagan.
Maktabni bitirgach Burak Marmara universitetida tasviriy san’at va kino yo‘nalishida ta’lim olish bilan birga podiumlarda model sifatida chiqish qila boshlagan. 2006-yilga qadar Turkiyaning eng talabgir modellaridan hisoblangan. 2003-yilda 17 yoshli Burak “Turkiyaning eng yaxshi modeli” tanlovining mutlaq g‘olibi, shuningdek, “Dunyoning eng yaxshi modeli” tanlovida ikkinchi o‘rin sohibi bo‘lgan.
Karyera
O‘smirlar hayoti haqidagi “Minus 18” trilleridagi kichik ishtiroki uning aktyorlik karyerasidagi ilk roli bo‘lgan. Ushbu filmdan ko‘p o‘tmay “Oilaviy uy” kinokomediyasi, “Sotqinlik” psixologik dramasida va “Kichik sirlar” filmida rol ijro etadi. “Muhtasham yuz yil” tarixiy-biografik serialdagi Malkacho‘g‘lu Balibey roli unga katta muvaffaqiyat olib kelgan bo‘lsa, “Choliqushi” filmining yangi talqinidagi Kamron obrazi bilan u butun dunyoga mashhur bo‘ldi.
Ushbu filmdan keyin u rejissorlardan suratga tushish uchun taklifni uzoq kutishiga to‘g‘ri kelmagan. Chunki dunyoning turli nuqtalaridagi muxlislar Burak ishtirok etgan filmlarni qayta-qayta so‘ray boshlagan. Shundan keyin “Sevgi senga o‘xshaydi” melodrammasida ishtirok etgan.
2015-yilni esa aktyor karyerasidagi eng omadli yillardan deb hisoblasa bo‘ladi. Negaki aynan shu yili butun dunyodagi tomoshabinlar sevib tomosha qilgan, o‘zbek telekanalida “Sevgi iztirobi” nomi bilan efirga uzatilgan “Kara sevda” seriali suratga olingan. Romantik filmda Burak Neslihan Atagul bilan sevishganlar rolini ijro etib, muxlislar, ayniqsa qizlar mehriga sazovor bo‘lgan.
“Sevgi iztirobi”dagi juftlikning hayotda munosabatlari qanday ekani kino tomoshabinlarini eng ko‘p qiziqtirgan savol hisoblanadi. Internetda ularning munosabatlari qay darajadaligi bilan bog‘liq mish-mishlarni-ku aytmasa ham bo‘laveradi. Fakt esa shuki, serialdagi voqelik va ekran ortidagi reallik tubdan farq qiladi. Burak va Neslihanni faoliyati bilan bog‘liq zo‘raki aloqalar bog‘lab turgan. Do‘stona boshlangan munosabatlardan keyinchalik asar ham qolmagan.
Shaxsiy hayot
O‘zchivit 2014-yilga qadar mashhur turk jurnalistining qizi, fotomodel Jeylan Chapa bilan jiddiy munosabatda bo‘lgan, biroq Jeylanning asossiz rashki tufayli juftlik ajrashgan. Ma’lum bo‘lishicha, Jeylanning turli gumonlar sabab suratga olish maydonchasiga bostirib kelishi, ishonmasligi aktyorni asabiylashtirgan.
“Choliqushi” serialining suratga olish ishlari boshlanganda aktyor bo‘lajak rafiqasi Faxriye Evjan bilan tanishadi. “Sevgi senga o‘xshaydi” melodrammasida birgalikdagi ishtiroki vaqtida ular orasida iliq munosabatlar paydo bo‘la boshlaydi.
Faxriye o‘ziga yarasha qaysar fe’l-atvorga ega bo‘lishiga qaramay, Burakga nisbatan sabrli va og‘ir-bosiq munosabatda bo‘lgan. Jurnalistlar bilan bo‘lgan suhbatda u o‘ziga yoqmagan taqdirda ham Burakning odatlariga qarshilik bildirmasligini, insonning qandayligini bilib turib tanlov qilgach, uni o‘zgartirishga urinish mantiqqa to‘g‘ri kelmasligini ta’kidlagan.
O‘zchivit oradan ko‘p o‘tmay Faxriyeni ota-onasi bilan tanishtirgan va ular 2017-yilning 29-iyun kuni turmush qurgan. Juftlik shov-shuvli marosim xohlamagan, lekin mashhur yulduzlar tantanasi shunchaki o‘tib ketmasligi aniq edi.
To‘y marosimi Bosfor sohili bo‘yidagi Sait Halim Pasa villasida bo‘lib o‘tgan. Tashrif buyurgan mehmonlarning o‘sha zahotiyoq ulashgan Instagram’dagi jonli efirlari, foto va videolari juftlik muxlislari sevimli kumirlarining baxtli kuni qanday o‘tayotganini virtual kuzatishiga sabab bo‘lgan. Kelin va kuyov to‘ydan so‘ng Maldiv orollariga jo‘nab ketgan. Ular 2019-yilning 13-aprelida o‘g‘il farzandli bo‘ldi va unga Karan deb ism qo‘yishdi.
Shaxsiy hayotini ko‘z-ko‘z qilishni yoqtirmaydigan yosh oila farzandi dunyoga kelganidan sakkiz oy o‘tib o‘g‘lining suratini ommaga namoyish qildi. Juftlik 2023-yilning yanvar oyida yana bir o‘g‘il farzandli bo‘lishdi. Chaqaloqqa Kerem deb ism qo‘yilgan.
Burakning O‘zbekistonga tashriflari
Burak O‘zchivit O‘zbekistonga ilk marta 2019-yilning fevralida kelgan edi. O‘shanda aktyor Toshkentga aynan muxlisalari bilan ziyofatda ishtirok etish uchun kelgan.
Ular orasida O‘zbekistondagi nufuzli shaxslarning rafiqalari, biznes-ledilar, model biznesi vakilalari ham bo‘lgan.
Xabarlarga ko‘ra, o‘z iste’dodini qadrlovchi ayollar bilan 2,5 soatlik muloqoti evaziga u 2 million turk lirasi (qariyb 380 ming dollar) pul ishlab olgan.
Aktyor O‘zbekiston unga juda yoqqanini, u yerda ko‘plab xushmuomala va mehmondo‘st kishilarni uchratgani, shu sababli albatta u yerga qaytib borishini aytgan.
Burakning O‘zbekistonga ikkinchi tashrifi 2022-yilning sentyabr oyida kuzatildi. Turk aktyori Toshkent xalqaro kinofestivalida ishtirok etish uchun poytaxtga keldi.
Izoh (0)